[A:༢༢ན]ཁྱེད་ཀྱི་རྒྱུད་དོན་ཇི་ལྟར་འཆད་ཅེ་ན། ཁོ་བོ་ཅག་ནི་རྒྱུད་ལས། རྐྱེན་གྱི་འགའ་ཞིག་མ་འོང་ན། །ཞེས་པ་དེ་གཞིར་བཞག་ནས། རྐྱེན་དགོས་ཀྱི་ཚེ་ཁ་འཆམ་ལ་དབང་བསྐུར་བྱས་ཆོག་པ་དང་། རྗེས་བཟུང་གི་ཆོ་གའི་ཁོངས་སུ་མི་གཏོགས་ཀྱང་། རྗེས་བཟུང་གི་ཡོན་ཏན་དང་ལྡན་པ་གཞན་དག་ལ། སྟ་གོན་བྱས་ནས་དབང་བསྐུར་ཆོག་པའི་དོན་དུ་འཆད་ལ། ཁྱེད་ཀྱིས་ནི་དམིགས་བསལ་མེད་པར་རྒྱུད་ཀྱི་དངོས་བསྟན་སྤྱི་ཁྱབ་ལ་སྦྱར་ནས་འཆད་ཚུལ་འདྲ་བ་མ་ཡིན་ནོ། །བྱེ་བྲག་ཏུ་གཟུགས་བརྙན་ལ་སྟ་གོན་བྱས་པ་ནི། སློབ་མ་འགའ་ཞིག་ཚེའི་དུས་བྱས་པ་ལ་དགོངས་ཏེ། སློབ་དཔོན་སྙིང་རྗེ་ཆེན་པོ་དང་ལྡན་པས་གཟུགས་བརྙན་དེ་ལ་དབང་བསྐུར་བ་ཡང་མཛད་པའི་དོན་འདི་ལ་བསམ་ནས་བོད་དུ། རྗེས་བཟུང་གི་སློབ་མ་ཡུལ་གཞན་དུ་སོང་བའམ། བཙོན་དུ་ཚུད་པའམ། ལུས་སྲོག་དང་ཚངས་སྤྱོད་ཀྱི་བར་ཆད་བྱུང་དོགས་པའི་ཚེ་གཟུགས་བརྙན་ལ་དེའི་ཤེས་པ་བཀུག་ནས་དབང་བསྐུར་བྱེད་པ་སོགས་ཀྱི་ལག་ལེན་བྱུང་བར་སྣང་ངོ་། །འདི་དང་འདྲ་བ་ཞིག་གི་སྐབས་ལས་བརྩམས་ཏེ། བྲོ་པའི་མཁན་པོ་རྣལ་འབྱོར་བྱང་སེང་གིས། རྗེ་བཙུན་ཆེན་པོ་ལ་དྲིས་པའི་ལན་དུ། གསོན་ལ་བུམ་པ་འཆའ་བ་དེ། །ཞེས་སོགས་གསུངས་པར་སྣང་ངོ་། །གཉིས་པ་ལམ་འབྲས་འཆད་ཚུལ་དང་འགལ་བ་ནི། ཁྱེད་ཅག་གི་རྗེ་བླ་མ་དམ་པའི་དགོངས་པར་བྱས། རྡོ་རྗེ་སློབ་དཔོན་འགའ་ཞིག་གི་དྲུང་དུ་གསུང་ངག་རིན་པོ་ཆེ་གཞུང་ཇི་ལྟ་བ་བཞིན་དུ་དཀྲི་བའི་ཁྲིད་དོན་དུ་གཉེར་བ་དག་འོང་པ་ན། ཐོག་མ་ཁོ་ནར་དབང་བསྐུར་བ་དང་། དམ་ཚིག་དང་ལྡན་པར་བྱེད་དགོས་པ་ཉིད་དུ་