[A:22b]'dod pas/ dbang de'i thog mar sta gon dang / de'i thog mar rjes bzung 'gro dgos/ rjes bzung de yang dbang gi chu bor bshad pa de las gzhan khyed la med pas/ thog mar dal 'byor rnyed dka' nas/ don dam sems bskyed la thug pa'i bar ji lta ba zhig rgyud la skyed du bcug nas/ de la rjes 'dzin gyi cho ga phyag len bzhin byed dgos so/ /dgos mod de las ci 'gyur zhe na/ don gnyer can de dag la snang gsum gyi khrid tshar gnyis zlos pa can du 'bog dgos par 'gyur ro/ /de ltar thal ba las ni/ lam 'bras pa'i rgyu dus kyi dbang bskur snang gsum gyi khrid kyi dkris zin pa'i 'og tu bskur dgos pa yang grub/ nam du yang ni su yis kyang / /lung bstan ma nus rgol ba'i lan/ /'dir byung 'char ka'i 'od ris kyis/ /gnas 'dir rmongs pa'i lam las grol/ /rgol ba gsum pa ni/ sta gon 'brel pa med pa dang / /zhes pa'i rgyas bshad du/ slob ma smin byed rdul tshon gyi dkyil 'khor gcig tu thog ma'i dbang bskur tshar gcig pu de rigs mod/ de'i rjes su dkyil 'khor gcig pu de nyid kyi steng nas nyin re bzhin sta gon snga ma'i dngos gzhi re dang / dngos gzhi rting ma'i sta gon re spel nas zhu mkhan ma rdzogs kyi bar du byed do/ /'di shin tu mi rigs pa'i rgyu mtshan smin byed rdul tshon gyi dkyil 'khor gcig tu dbang bskur tshar gcig las lhag pa bskur du mi rung ste/ dkyil 'khor de la sta gon gcig las med pa'i phyir zhes/ sa skya pa'i srol 'dzin gzhan thams cad kyis 'chad la/ khyed kyi de lta bu la gong ma'i lung yod na ston cigagal te sta gon gsum po sngar byas pa des chog go zhe na/ 'o na bsgrub mchod sogs kyang sngar byas pa de nyid gnas pas/ nyi ma gzhan la byed ci dgos/ gal te sta gon snga ma rnams bskyar na byed dgos she na/ dkyil 'khor bsgrub zin nas/ de'i lha sta gon ji ltar byed ces dang / gzhan yang 'brel med kyi rtsod lan kha cig bkod nas/ de'i shugs la bsgrub mchod rting ma rnams kyi tshe sa lha'i sta gon byed thub pa zhig yod na/ sta gon 'brel pa med pa dang / zhes pa'i rgol ba de zlog thub par khas len no/ /'di'i lan la gnyis te/ dngos bstan rtsod phreng so so'i lan dang / zhe 'dod dgongs pa'i lan dpyis phyin pa'o/ /dang po la gnyis te/ rtsa ba'i gtan tshigs ma nges pa dang / gtan tshigs de bsgrub byed kyi rigs pa mtha' ma chod pa'o/ /dang po ni/ 'o na smin byed kyi dkyil 'khor du slob ma gcig las lhag par dbang bskur mi rung par 'gyur te/ sta gon gcig las med pa'i phyir dang / sta gon gcig pu de slob ma gral gong ma de'i sta gon dang 'brel bas/ slob ma gral 'og ma rnams kyi sta gon la 'brel yul gyi lha sta gon mi 'dug pa'i phyir/ med pa ma yin te/ lha sta gon gcig pu de rting ma rnams kyi 'brel yul du gnas pa'i phyir zhe na/ 'o na dbang tshar rting ma rnams kyi slob ma sta gon yang / lha sta gon gcig pu de la 'brel bar 'gyur te/ 'brel zla'i dus su 'brel yul gnas pa'i phyir/ /khyed kyis bkod pa'i gtan tshigs 'di/ /kho bo cag la ma nges par ma zad 'gal ba yin te/ sta gon gcig pu ji srid gnas kyi bar