[A:25a]
'brel pa yod med la thug cing / de yang dbang gi mngon par rtogs pa mtha' dag tshang ma tshang la thug de tshang ba yang rang don du bzhengs pa'i dkyil 'khor de la dgos pa'i yo byad rnams slob dpon la sbyar ba nas bzung ste/ mngon par rtogs pa bshad tshod rnams tshang na/ ras bris kyang smin byed kyi dkyil 'khor du 'gro ba ni dbang chu'i dgongs pa dang / de ma tshang na rdul tshon gyis kyang smin byed du mi 'gro ba ni chos rje'i dgongs pa'o/ /nges pa'i don du na blos blang pa'i pho brang dang / tshon rtsi sogs rnam shes la snang ba ni dmigs pa'i rten tsam yin gyi/ smin byed kyi dkyil 'khor dngos ni/ ye shes las grub pa nyid gtso bor gyur pa dang / ma 'ongs pa'i slob ma deng sang gi rjes bzung gi grangs la mi gtogs kyang / dkyil 'khor de'i rgyu tshogs su song ba'i yo byad kyi skyin po phun sum tshogs par sbyor nus pa'i slob ma dag gis smin byed du ji ltar 'gro ba'i thabs mkhas ni/ sngon gyi rdo rje slob dpon lta ba dang snying rje chen po dang ldan pa dag la yod pas na/ ma 'ongs pa'i slob ma smin par byed dgos pa dag dang / rang gi brgyud pa 'dzin pa'i rdo rje slob dpon phyis 'byon rnams la nye bar mkho ba'i don du blos bslang ba dang / ri mor bris pa'i dkyil 'khor dag bsgrub par mdzad pa yin no/ /blo rgya chung rnams nam mkha'i khyon/ /'dom pa'i tshad kyis 'jal byed mod/ /chos kyi dbyings su ro gcig par/ /mkhyen kyang rnam shes snang mi 'dor/ /rgol ba bzhi pa ni/ 'di skad du/ slob dpon grangs nges med pa dang / /zhes pa de'i rgyas