[A:38a]lam gyi rgyud sbyangs ba sogs byas nas/ bzod dbang gi smin par bya dgos par bshad pa las/ khrid tshul gyi rim pa de khyed la med pas phyogs gang du'ang rung ba ma yin no/ /gnyis pa la gnyis te/ phyogs snga ma'i 'dod pa skyon med du bstan/ rgol ba'i grub mtha' rtsa ba nas mi rung bar bstan pa'o/ /dang po ni/ 'o na phyogs snga ma rang gi rjes 'dzin lugs snga phyi gang gi rjes su 'brangs/ dang po ltar na nyes pa de dag phyogs snga la yang mtshungs la/ phyi ma ltar na grangs nges med pa'i nyes pa de so na gnas so snyam na/ kho bo cag rjes 'dzin gyi rnam gzhag rje btsun gong mas bshad pa de ltar 'dod la/ de'i khungs ni sambu Ti las/ slob ma'i pus mo'i lha nga ni/ zhes sogs kyis bstan par ljon shing las bshad pas spyi rgyud kyi dngos bstan dang cung zad ma mthun yang nyes pa chen por mi sems te/ rgyud tha dad kyi dgongs pa yin pas/ de lta na'ang dbang chu'i dngos bstan dang 'gal lo snyam pa'i tsher ma khong du sbed dgos pa ma yin te/ der grangs nges su bshad pa de spyi khyab tu sbyar mi dgos pas nyes pa ste shin tu spangs sla ba'i phyir ro/ /ji ltar na lung dang rigs pa gnyis kyi sgo nas so/ /lung ni rnam snang mngon byang las/ gcig gnyis bzhi las lhag kyang rung / /dpyad mi dgos par bzung bar bya/ /zhes dang / slob dpon snying rje chen po dang ldan pa sems can gyi khams ma lus pa bsgral ba'i dbang du byas te/ des byang chub kyi sems kyi rgyur 'gyur bar byas pa'i phyir/ slob ma tshad med pa bzung bar bya'o/ /zhes