[A:43a]sa chog ma byas kyang rung par bshad pas so snyam na/ 'o na/ gzhi bsnyen 'brel pa med pa dang / /sa chog 'brel pa med pa dang / /zhes pa'i nyes pa zhig kyang thog tu babs par 'gyur te/ dang po nyid du byas zin pa'i gzhi bsnyen dang / sa'i cho ga de dang / da ltar gyi slob ma'i don du bzhengs pa'i dkyil 'khor gnyis la khyod 'dod pa'i 'brel pa de mi 'dug pa'i phyir/ smin byed kyi dkyil 'khor gcig tu slob ma gcig las lhag pa la dbang bskur du mi rung bar 'gyur te/ sta gon gcig las med pa'i phyir dang / gcig pu de slob ma gral gong ma de'i sta gon dang 'brel pas slob ma gral 'og ma rnams kyi sta gon dang 'brel yul gyi lha sta gon mi 'dug pa'i phyir/ med pa ma yin te/ lha sta gon gcig pu de 'brel yul du gnas pa'i phyir zhe na/ 'o na kho bo cag gi dbang tshar rting ma rnams kyi slob ma sta gon yang lha sta gon gcig pu de la 'brel bar 'gyur te/ 'brel zla'i dus su 'brel yul gnas pa'i phyir te/ slob ma de dag gi don du spyan drangs pa'i lha sta gon gyi lha de/ de dag gi don du bzhengs pa'i dkyil 'khor de la gnas pa'i phyir ro/ /yang slob ma nyer lnga po re re la lha sta gon re re ste nyer lnga yod pa'i phyir sta gon yang nyer lnga yod dgos par 'gyur ro/ /de mi dgos na 'brel zla dang 'brel yul grangs mnyam dgos pa 'gal lo/ /yang 'brel zla'i don slob ma la mi byed par cho ga de'i byed las la 'dod do snyam na/ 'o na sta gon dang 'jug pa'i tshe las bum gyi bskyed chog re re dang / bum chus gsang ba re re spel nas bya dgos pa