[A:46a]gnyis ka las nyer lnga po thams cad la slob dpon gyi dbang cig car du bskur ba bkag pa'i phyir te/ ji skad du/ slob dpon snying rje chen po yi/ /slob ma dam pa snying rje can/ /sngags dang rgyud rnams 'dzin pa po/ /gcig nas nan tan bskyed nas bzung / /zhes pa'i lung gi tshogs pa thams cad la dbang bskur ba mi bya ste/ slob ma'i gtso bor gyur pa dbang stegs la bzhag ste zhes dang / yang dbang bskur nas bkra shis brjod zin pa'i 'og tu thams cad bkug nas de kho na nyid bstan par bya'o/ /zhes gsungs pa'i phyir rje btsun gong mas bkag pa de nyid nan gyis bsgrub par ma byed cig ces rgol lo/ /lan la gsum ste/ rnam dbye spyir bstan/ nges bzung med kyang nyes med du bstan/ rgol ba po nyid nyes pa chen pos gnon pa'o/ /dang po ni/ rdo rje slob dpon gyi dbang la grangs nges bstan bya mi dgos pa kho bo cag gi grub pa'i mthar byas pa med de 'ong / grub mthar ma byas kyang dgag dgos kyi dbang gi de ltar byas pa tsam la lung rigs kyis gnod byed 'phen pa ni mkhas pa'i lugs min la/ gzhan du na slob dpon dang slob ma rgyud sde nas bshad pa'i mtshan nyid thams cad rdzogs pa med na dpon slob tu mi bzung ba dang / rjes bzung gi tshe longs spyod gang yod bla ma la mi 'bul ba dang / longs spyod med pa rnams kyi bla ma la bkur bsti'i sgo nas bla ma mnyes par mi byed na rjes bzung mi bya ba dang / sta gon gyi dus su tshe 'di don gnyer gyi blo yod na sta gon mi bya ba dang / 'jug pa'i tshe ye shes ma phebs pa dkyil 'khor du mi