[A:49a] dang / dbang mi bskur bar dbu rgyan rang chas can du bsgrub pa'i yan lag bzhi dang / bsdus pa phyi ma ni dam tshig sems dpa' dbu rgyan rang chas can du skad cig mas bskyed pa rnams yin par ljon shing las bshad do/ de ltar na 'grel pa lugs kyi brtul zhugs dang slob dpon gyi dbang gnyis kyi dbang rdzas la drangs ma thag pa'i bskyed chog 'bring po de sbyar ba yin zhing / man ngag lugs kyi de gnyis las bsdus pa phyi ma de sbyar ba yin te/ dang po la rdo dril gyi lha thams cad la yan lag bzhi rdzogs dngos su mdzad pa'i phyir dang / phyi ma la rdo rje la lha nyi shu rtsa brgyad dang / dril bu la lha nyi shu rtsa gsum skad cig gis bskyed pa'i phyag len de gnyis so sor mdzad pa'i phyir ro/ /'o na bskyed chog phyi ma de la yan lag bar pa gnyis dngos su med pas yan lag bzhi rdzogs su byar mi rung ngo zhe na/ de 'dra smra ba'i rmongs pa mang mod/ de ni kho bo cag la smra ba'i zol gyis rje btsun nyid la klan ka smra ba yin te/ tshig rigs de snyon med du rje btsun gyis bshad pa'i phyir dang / slob dpon rin po ches kyang tshul de ltar du bshad pas so/ des na rgol bas drangs pa'i rje btsun gyi gsung de dang / kho bo cag gi phyag len la mi mthun pa cung zad kyang mi snang mod/ mi mthun par sems pa ni rgol ba rang gi yongs dag bzhi la rgyas bsdus du ma yod pa blo'i yul du ma byas shing / phyogs cig nyid la a 'thas pa'i nyes pa de gzhan la nan gyis bkod pa'o/ /'o na man ngag lugs kyi tshe bskyed tshul de tsam gyis chog pa gang gis shes zhe na/ dbang chu