[A:69a]bskyed chog rgyas par byed dam/ brtul zhugs kyi tshe sbyang gzhi stong par sbyong ngo zhe na/ de'i sbyang gzhi dang slob ma'i gzhi mthun gang la byed/ khyad par slob dpon gyi tshe bdag dang dbang rdzas kyi bdag de dbang stegs la 'jog kha de'am zhag zin pa de yin/ de gnyis ji ltar yang thog mar mi dmigs par ma btang ba'i yongs dag bzhi mi srid/ btang na rdor sems med par byed dgos/ byin gyis brlabs tshul rgyu dus dang 'dra na dbang rdzas la dag pa bzhi zin nas slob ma la dbang bskur mi dgos sam/ dbang rdzas dag pa bzhis sgrub pa'i tshe rdo rje mi dmigs par byas nas lhar bskyed pa zhu ba las rdo rjer gyur pa zhig slob ma la ster mi dgos sam/ yin na rdo rje'i dbang bskur tshul du song gi slob dpon gyis der ma song / dril bu la'ang de dang 'dra zhing / slob dpon gyi skabs su phyag rgya'ang dbang rdzas kyi gtso bor mi 'dod dam zhes gsungs/ /don tshan gnyis pa la/ rje btsun gyis gzhan rnams rgyu dus dang 'dra'o zhes pas rgyu lam gnyis ka'i brtul zhugs dang slob dpon gyi dbang la yongs dag bzhi tshang mi dgos par grub ste/ slob dpon rin po che'i dbang chu gnyis ka las stong pa'i ngang las hU~M las rdo rjer bskyed ces pa yod kyi/ lhar bskyed pa mi snang bas de med par yongs dag bzhi ji ltar tshang / gal te rdo rje'i de kho na nyid rdzogs par bskyed nas zhes pas dag pa bzhi 'thon snyam na/ yongs dag bzhi la rdo rje'i de kho na nyid du su yang mi bzhed/ nges don gyi rdo rje ni sangs rgyas thams cad tshang ba'i rdo rje sems dpar/ 'di de sangs