[A:74b]rgyas yab yum du 'chad pa'am/ rtsa khams nyid lha zhal phyag gi rnam pa can rdzas gzhan mang po bsgrub pa'i gzhir 'dod kyang rung ste/ phyogs gnyis ka'i ngos ma zin pa'i phyir 'dam kha med do/ /ji ltar zhe na las nyon gyi rnam par smin pa ni rang bzhin gyi sangs rgyas dang / glo bur rnam dag gi sangs rgyas gnyis su sus kyang sgrub mi nus pa dang / bskyed rdzogs kyi lha gang yin kyang bsgrub gzhi zhig las bsgrub dgos na de'i mthar thug gi rtsa ba gzhi dus kyi ye shes nyid la thug dgos pa'i phyir zhes gsungs/ don tshan gnyis pa la gzhir gnas kyi dkyil 'khor bzhi la sku bzhi rang bzhin lhun grub dang / yon tan gnas 'gyur du 'byung ba gnyis gnyis su dbye ba ni/ rang bzhin rgyu la bsam na lhun grub ste/ /mtha' yas yon tan tshogs rnams gnas 'gyur yin/ /zhes bstan pas na lus dbyibs kyi rang bzhin dang / de'i chos nyid sprul sku rang bzhin lhun grub dang / de bzhin du gzhan gsum la'ang sbyar bas chos can dkyil 'khor bzhi po grub tsam nas de'i chos nyid sku bzhi po ngo bo dbyer med yin te/ bum pa rdzas tha dad par snang ba bzhin dang / de'i go sa na yod pa'i nam mkha' dbyer med pa bzhin dang / ji srid bum pa lta bu'i sgrib thogs ma bsal ba de srid du/ de'i nam mkha' gzugs can gzhan gyi go skabs mi 'byed pa de bzhin du/ ji srid shes rab kyi dbang po'i rnam smin gyi lus rtsa dang / de'i chos nyid sprul sku rang bzhin lhun grub go sa tha mi dad du gnas pa la/ de ltar du bla mas brda sprad nas shes pa'i tshe lus dkyil ngo 'phrod pa zhes bya la/ de'i 'og tu shes rab