[A:99b]ltar smras pas brdzun smra ba'i pham par mi 'gyur te/ nyan thos kyi lugs la der 'gyur ba la dran shes bzhin gyis zin pa zhig dgos shing / rdo rje theg pa'i skabs su rang nyid sangs rgyas su bskyed cing sangs rgyas su gsal ba'i sgo nas de ltar smra ba la pham par ga la 'gyur zhes gsungs so/ /yang rdo rje gdan pa chen po'i grub pa'i dga' ston las gsang ba kun rgyan las 'byung ba 'gog pa'i tshe/ thog mar 'dir rab tu byung ba sdom brtson rnams kyis tshogs 'khor byed na zhes sogs gsang ba kun rgyan las 'byung tshul gong du bkod pa de rnams phyogs sngar bshad nas/ de dgag pa ni skyes bu gang dag gzhan la zhe sdang bzhin du chang gis myos na smra ba thams cad la go rim med cing rang gi phyogs blos btang nas ldab ldib tu smra bar byed pa ltar/ khyod kyang bla brang gi chags sdang gis snyigs dus kyi thub pa rdo rje 'chang theg chen chos kyi rgyal po la zhe sdang bzhin du mi shes pas myos te lung rigs dang bral zhing / rdo rje theg pa'i nyams len thams cad blos btang nas ngan g.yo'i rtsom pa 'ba' zhig byed par zad mod/ rigs pa dang 'gal ba ni ci dge slong rdo rje 'dzin pas sngags kyi nyams len byed pa ni gang 'dul ba dang mi mthun pa de'i tshe sngags gtso che ba zhig gam/ 'dul ba gtso che ba zhig dang po ltar na tshogs 'khor gyi tshe 'dul ba dang ma mthun ces sun dbyung du ci yod/ phyi ma ltar na dge slong rdor 'dzin gyis 'dod yon bsten byar mi byed par thal/ theg pa thun mong bas 'dod yon spong ba gang zhig gong ma las 'og ma gtso che ba'i phyir/ phyi ma khas/ 'dod na