[A:15b]'phros don dang bcas pa la/ phyogs snga ma'i 'dod pa skyon med du bstan pa dang / rgol ba'i grub mtha' rtsa ba nas mi rung bar bstan pa dang gnyis su mdzad nas/ dang po la/ 'o na khyed rang gi rjes bzung lugs gnyis po de gang gi rjes su 'brang / dang po ltar na ni skyon de dag khyed la'ang mtshungs/ gnyis pa ltar na grangs nges med pa'i skyon de so na gnas so zhe na/ kho bo cag rje btsun gong mas bshad pa ltar 'dod la/ de'i khungs kyang sambu Ta las/ slob mas pus mo'i lha nga ni/ /zhes sogs kyis bstan par ljon shing las bshad pas/ spyi rgyud kyi dngos bstan dang cung zad ma mthun yang nyes pa chen po med cing / dbang chur grangs nges su bshad pa de spyi khyab tu mi sbyor bas lung rigs gnyis kyi sgo nas dbang chu dang 'gal ba'i nyes pa spangs sla ste/ lung ni rnam snang mngon bya las/ gcig gnyis bzhi las lhag kyang rung / dpyad mi dgos par gzung bar bya/ /zhes dang / slob dpon snying rje chen po dang ldan pa sems can gyi khams ma lus pa bsgral ba'i dbang du byas te/ des byang chub kyi sems kyi rgyur 'gyur bar bya ba'i phyir slob ma tshad med pa bzung bar bya'o zhes gsungs pa dang mthun par/ slob ma dbang bskur la grangs nges dgos pa'i dmigs bsal du sbyor bas dbang chu dang yang mi 'gal/ gal te lung de dag dbang chur rjes bzung gi skabs su drangs pas dbang gi grangs nges kyi dmigs bsal min zer na/ lung phyi ma de'ang 'phags pa rin po che'i brtag gnyis kyi TIkka snying po gsal bar rjes 'dzin gyi skabs su drangs pas