[A:49b]phyag len ma dag pa'ang ma yin te/ rje btsun gong ma'i skabs nas rgyud sbyangs ba sngon du song ba'i slob ma rnams la thog mar dbang bskur nas/ de nas snang gsum sogs khrid kyi rim pa ston pa'ang mang du byung / yang rgyud sbyangs pa sngon du ma song ba 'ga' zhig gam sbyangs ba sngon du song ma song thun mong du tshogs pa rnams la thog mar snang ba gsum gyi khrid rim phar phyin rang rkang la sbyar nas rgyud sbyangs te de tsam gyis chog par bzung nas sngags la mi mos pa dag la dbang mi bskur/ sngags la mos shing rdo rje 'chang gi go 'phang myur du 'dod pa dag la dbang bskur te sngags lam gyi khrid sogs rgyas par 'chad pa da lta'i bar du ngor pa dag gi phyag len la yod cing / grwa ston zhus lan du gsal bar 'byung ba de yin/ de ltar snga mo nas srol gnyis byung ba de mi sems par phyogs 'dzin gyi sgo nas chos spong gi las bsog pa 'ga' zhig chos rje bla ma slob brgyud dang bcas pa la skur 'debs byed pa dang / ngor pa nang tshogs kyi lugs srol tha dad pa na yang paN chen kong ston gyis mdzad pa'i khrid yig na snang gsum gyi skabs su bla ma rdo rje 'chang du bsgom par bshad pa dang / khyad par bdag chen rdo rje 'chang blo gros rgyal mtshan dpal bzang po brgyud 'dzin dang bcas pa snang gsum khrid kyi skabs 'dir bla ma brgyud pa dang bcas pa rdo rje 'chang du bsgoms nas skyabs su 'gro bar mdzad pa la/ phyis kyi rang phyogs pa phal cher de ni mi 'thad de/ snang gsum khrid 'di phar phyin lam gyi skabs yin zhing / pha rol tu phyin pa la bla ma rdo rje 'chang du bsgom pa med pa'i phyir/ des na