[A:༡༡༦]བྱུང་། ཆུང་བ་ལྷོ་བྱང་ཡོངས་ལ་མངའ་སྒྱུར། དཔའ་གཏུམ་གྱི་གྲགས་ཆེ། མཆེད་གསུམ་གྱི་རིགས་ལས་ནམ་མཁའི་རྒྱལ་མཚན་ཀུན་དགའ་རིན་ཅེན། བཀྲ་ཤིས་སྟོབས་རྒྱས་དབང་པོའི་སྡེ་སོགས་འཁྲུངས་པ་ལས། འདི་ཉིད་སློབ་དཔོན་ཆེན་པོའི་ཟབ་ཆོས་ཀྱི་བདག་པོར་བཀའ་བབས་སོ༎ སྨྲས་པ།
འོད་གསལ་འཆི་མེད་ལམ་ལས་བབས་པའི་འཁོན་གྱི་བརྒྱུད་པ་རིན་པོ་ཆེ༎
ཤར་ཕྱོགས་གོང་མའི་རྒྱལ་མཚན་རྩེར་མཆོད་ཆེན་པོའི་ལས་ཀ་འདོད་རྒུའི་ཆར༎
འཛམ་གླིང་ཁྱོན་ཀུན་མངོན་པར་སྙིལ་བའི་མུ་ཐི་ལ་ཡི་ཀཱརྞི་ཀ།
རིན་ཅེན་ཉམས་འགྱུར་ཕྲ་ཚོམས་ཀྱིས་མཛེས་ཡ་རབས་མདུན་སའི་རྒྱན་དུ་སྤེལ༎
གཡུང་པོའི་ལུགས་མིན་རིགས་རུས་ཆོ་འབྲང་ལྡན༎
གོང་མའི་ལུང་འཛིན་སྲིད་ཀྱིས་མངོན་མཐོའི་མཁར༎
རྣམ་དཀར་ཟླ་ཤེལ་དྲི་མེད་ཟིལ་མངར་ཅན༎
བདེ་སྐྱིད་ཀུནྡ་དགའ་བའི་གྲོགས་སུ་འཛག།
ཁ་བས་བསྐོར་བའི་ལྗོངས་ཆེན་པོ་འདི་ཉིད་དུ་དཔལ་དྭགས་པོའི་བཀའ་བརྒྱུད་ཀྱི་བསྟན་པ་ནགས་ཀླུང་སྟུག་པོའི་དབུས་སུ་དཔག་བསམ་ཡོངས་འདུའི་ལྗོན་པ་ལྟ་བུ་ནི་དཔལ་ཕག་མོ་གྲུ་པ་རྡོ་རྗེ་རྒྱལ་པོ་ཞེས་དབང་པོ་