[A:༡༡༧]ཐ་མལ་པ་རྩོད་དུས་ཀྱི་གདུལ་བྱའི་སྣང་ངོར་རིམ་གྱིས་སྦྱངས་པའི་སར་གནས་ཀྱི་སེམས་དཔའི་ཚུལ་འཛིན་ཅིང་། དབང་པོ་ཡང་རབ་ལ་དུས་གསུམ་གྱི་སངས་རྒྱས་ཡིན་པར་ཞལ་གྱིས་བཞེས་པའི་སྙན་གྲགས་ལྷ་ཡི་རྫ་རྔ་སྒྲུབ་རྒྱུད་རྣམ་པར་རྒྱལ་བའི་ཁང་བཟང་གི་རྩེ་མོར་བརྡུངས་པས་མེ་ཏོག་མདའ་ཅན་ལྷ་མིན་གྱི་ཚོགས་མཐའ་དག་བརྣག་ནུས་ལས་འདས་ཏེ་ཕུན་སུམ་ཚོགས་པའི་ལེགས་བྱས་ཀྱི་བདུད་རྩིར་སྤྱོད་པ་ལ་ཉེར་འཚེའི་བསམ་པ་རིང་དུ་གཏོང་བའི་བྱེད་པོ་ཐེག་པ་ཆེན་པོའི་གླང་ཆེན་ས་ལ་རབ་བརྟན་གྱི་སྟེང་དུ་རྣམ་པར་འགྱིང་ཞིང་། ཡེ་ཤེས་འདྲེན་བྱེད་སྟོང་གིས་ཇི་ལྟ་ཇི་སྙེད་ཀྱི་ཆོས་མཐའ་དག་རྗེན་པར་འཆར་བ་ཀུན་སྟོང་ཆེན་ཕྱག་རྒྱ་གཅིག་གི་རྒྱས་ཐེབས་པའི་རྡོ་རྗེ་རྩེ་བརྒྱ་པས་བདག་འཛིན་རི་བོའི་བགྲོད་པ་མིང་གི་ལྷག་མར་བཏང་བའི་སྐྱེས་མཆོག་མཆོད་སྦྱིན་བརྒྱ་པ་འདི་ཉིད་ཀྱི་བཀའ་བརྒྱུད་ཡིན་ལ།
དེ་ཡང་ཆོས་སྲིད་ཀྱི་འབྱོར་པ་བླ་ན་མེད་པའི་སྒོ་ནས་ཡར་ལྡན་དུ་སྤེལ་བ་ནི་རྗེ་སྤྱན་སྔ་རིན་པོ་ཆེ་དང་། གོང་མ་ཏའི་སི་ཏུ་སོགས་དཔལ་ལྡན་རླངས་ཀྱི་གདུང་ལས་རིམ་པར་བྱོན་པ་རྣམས་ཡིན་པས། རླངས་ཀྱི་པོ་ཏི་བསེ་རུ་ལས། ལར་སྐྱེས་པའི་མིས་རང་གི་སྐྱེ་བརྒྱུད་མ་ཤེས་ན་ནགས་ཁུང་གི་སྤྲེའུ་དང་འདྲ། མི་རང་གི་ཆོ་འབྲང་མ་ཤེས་ན་གཡུ་འབྲུག་ཟོལ་མ་དང་འདྲ། ཡབ་མེས་ཀྱི་ཆེ་གེའི་ཡིག་ཚང་མ་ཤེས་ན། མོན་ཕྲུག་ཡལ་བོར་དང་འདྲ་ཞེས་དང་། སྐྱེས་པའི་མི་ལ་གྲགས་པའི་གཏམ་དགོས། བྱས་པའི་ཆོས་ལ་གྲུབ་པའི་མཐའ་དགོས། ཆེ་བའི་མི་ལ་མཐོ་བའི་རྟགས་དགོས་ཞེས་གསུངས་པ་ལྟར། བོད་གསིལ་བུར་མ་སོང་བའི་སྔ་རབས་ཀྱི་དུས་རྗེ་འབངས་མཐའ་དག་རིགས་རུས་འཆོལ་བར་མི་སྤྱོད་པས་ཁུངས་དང་ཡིག་ཚང་ལ་ནན་ཏན་དུ་བྱེད་པའི་སྲོལ་འདུག་ཅིང་། དེང་སང་ནི་འདི་རིགས་ཀྱི་རྒྱུ་མཚན་མང་དུ་སྨྲ་བ། སྤྲེལ་རྒན་རྣམས་ཀྱིས་མི་བཟུང་ནས། ། མཇུག་མ་མེད་ཅེས་བཞད་གད་བྱེད། ། ཅེས་པའི་ཚུལ་ལྟ་བུར་འགྲོ་བར་