[A:༡༡༨]གདའ་ནའང་གོང་གི་འཕྲོས་ལས་འདི་ཉིད་ཅུང་ཟད་བརྗོད་ན།
པོ་ཏི་བསེ་རུ་ལས། འབངས་ཀྱི་མི་རབས་ལ། འབྱུང་བ་སྣ་ལྔའི་སྙིང་པོ་ལ། སྒོ་ང་ཆེན་པོ་གཅིག་ཡོངས་པ། ཕྱིའི་སྒོང་ཤུན་ལ་ལྷ་བྲག་དཀར་པོ་ཆགས། ནང་གི་སྒོང་ཆུ་ལ་དུང་མཚོ་དཀར་མེར་འཁྱིལ། བར་གྱི་སྒོ་ངའི་དར་ཆ་ལ། ། རིགས་དྲུག་སེམས་ཅན་ཀུན་ཏུ་གྲོལ། ། སྒོ་ང་འཕྲུམ་གྱི་བཅོ་བརྒྱད་ཆགས། ། སྒོ་ང་བཅོ་བརྒྱད་འབྲིང་པོ་དེ། ། དུང་སྒོང་གཅིག་ཏུ་ཡར་ནས་བྱུང་༎ ་ཞེས་བཤད་པ་ལྟར། དུང་གི་སྒོ་ང་དེ་ལ་དབང་པོ་ལྔ་དང་ཡན་ལག་རྣམས་སོ་སོར་དོད་དེ་མཚར་སྡུག་གི་ཁྱེའུ་ཡིད་ལ་སྨོན་པ་ལྟ་བུ་ཞིག་བྱུང་བས་མིང་ཡེ་སྨོན་རྒྱལ་པོར་བཏགས། དེའི་ཇོ་མོ་ཆུ་ལྕག་རྒྱལ་མོ་ལ། འཕྲུལ་སྲས་དབང་ལྡན་འཁྲུངས། དེས་དུང་བཟའ་དངུལ་མོ་བླངས་པ་ལ། ཀྭོ་སྲས་སྐྱེས་གཅིག་འཁྲུངས། དེའི་སྲས་མི་རབས་མཆེད་གསུམ་ལས། ཆུང་བ་སྟག་ཚལ་འལ་འོལ་གྱི་ཇོ་མོ་འཚམས་བཟའ་ཁྱད་ཁྱུད་ལ་སྲས་མགུར་ལྷ་མཆེད་བཞི་བྱུང་། ཆུང་བའི་སྲས་ཡབ་ལྷ་སྡེ་དྲུག་གི་ཆུང་བ་འོ་དེ་གུང་རྒྱལ་གྱི་ཇོ་མོ་ལྷ་མོ་ལ། ལྷ་ཚ་མཆེད་དགུ་བྱུང་། ཇོ་མོ་གཉན་མོ་ལ་གཉན་ཚ་མཆེད་དགུ། ཇོ་མོ་རྨུས་མོ་ལ། རྨུ་ཚ་མཆེད་དགུ། ཇོ་མོ་ཀླུ་བཟའ་ལ་ཀླུ་ཚ་མཆེད་བརྒྱད་བྱུང་། ཀུན་བསྒྲིལ་བས་སྲས་སུམ་ཅུ་རྩ་ལྔ་བྱུང་། དེ་རྣམས་ཀྱི་ཆུང་བ་སྣེ་ཁྲོམ་ལག་ཁྲའི་ཇོ་མོ་ལྷ་ལྕམ་ལ། ལ་ཁ་རྒྱལ་པོ་འཁྲུངས། དེའི་ཇོ་མོ་ལུང་ཁ་ཧྲིལ་མོ་ལ་སྲས་གསུམ་གྱི་ཆེ་བ་མཐིང་གི། དེའི་ཇོ་མོ་ལྷ་ལྕམ་དཀར་མོ་ལ་སྲས་བོད་འཇོངས་ལ་བྲང་གི་རྨུ་བཟའ་མཐིང་བསྒྲིལ་ཁབ་ཏུ་བཞེས་པར་རྒྱ་ཁྲི་ལ་ཞང་འཁྲུངས། དེ་ལ་སྲས་རྒྱལ་པོ་ཆེ་ཆུང་གསུམ། བརྒྱུད་བརྒྱད་ཡོད་པ་ལས། ཆུང་བའི་ཇོ་མོ་མཐིང་མོ་ལ་སྲས་གསུམ་བྱུང་བའི་ཁྲི་རྗེ་གཉན་ཐང་གི་སྲས་དཔལ་ལྷ། དེའི་སྲས་ཨ་མི་མུ་ཟི་ཁྲི་དོའི་ཇོ་མོ་གཉན་བཟའ་ཤ་མིག་ལ་སྲས་གསུམ་དང་། རྨུ་བཟའ་ལ་སྲས་གཅིག་སྲེན་བཟའ་ལ་སྲས་གཉིས་ཏེ་དྲུག་བྱུང་