[A:༡༢༦]པར་སྨྲ་བ་སོགས་ནི་ཡིག་ཚང་ཁུངས་ཐུབ་རྣམས་མ་གཟིགས་པར་ཚོད་འཇོག་ཏུ་བྲིས་པའི་སྐྱོན་ཁོ་ན་སྟེ། ལོ་རྒྱུས་རྣམས་མ་ངེས་བཞིན་དུ་འབྲི་དགོས་པ་མོ་རྩིས་པ་བཞིན་གྱིས་ལུང་བསྟན་བྱུང་བ་ཡིན་ན་ཐུགས་བདེན་པར་མཆིས་སོ༎
འགྲོ་མགོན་རིན་པོ་ཆེའི་སྤྲུལ་པ་བཅུ་གཉིས་རིན་པོ་ཆེ་རྡོ་རྗེ་ནི་ལུང་རྟོགས་ཀྱི་ཡོན་ཏན་མཐའ་ཡས་ཤིང་། གདན་སར་ཕེབས་ནས་པུ་རངས་ལོ་ཆུང་གི་ཐུགས་དམ་དགྲ་ནག་ལ་གསོལ་བ་བཏབ་པས་ལྷོ་རྒྱུད་ཀྱི་འཁྲུག་པ་ཞི་བ་དང་མངོན་པར་མཁྱེན་པ་ཐོགས་པ་མེད་པ་སོགས་རྣམ་ཐར་ཡ་མཚན་ཅན་མང་ཞིང་། འདིའི་དུས་ཁྲི་དཔོན་རྡོ་རྗེ་དཔལ་གྲོངས་ནས་ཁོང་གི་གཅུང་གཞོན་ནུ་རྒྱལ་མཚན་ཁྲི་དཔོན་གྱི་གོ་སར་བསྐོས་ཀྱང་། མགོ་ལ་སྨྱུག་ཞྭ། ལུས་ལ་ཧོར་གོས། རྐང་པ་ལ་ཧོར་ལྷམ་གྱོན། མཚན་ཕྱེད་ཀྱི་རིང་གླུ་ལེན་ཞིང་བྲོ་བརྡུང་། ཉིན་ཕྱེད་ཀྱི་བར་ཉལ་བ་སོགས་བག་མེད་ཀྱི་སྤྱོད་པ་ཁོ་ནས་དུས་འདའ་བས་ཕག་མོ་གྲུ་པའི་སྡེ་ཚུགས་ལ་ཤིན་ཏུ་གནོད་པ་བྱུང་། ཁོང་འདས་རྗེས་ལྷོ་བྲག་གཤོང་སྡེ་མཁན་པོ་རིན་རྒྱལ་གོང་སར་བཏང་སྟེ་འཇའ་ས་ཞུས། དེ་རྗེས་ཡར་འབྲོག་པ་བྱང་གཞོན་ཁྲི་དཔོན་དུ་བསྐོས་ནའང་སྔོན་མའི་མིག་ལྟོས་ཀྱིས་བག་མེད་ཀྱི་སྤྱོད་པ་ཁོ་ནའི་དབང་དུ་སོང་༎
དཔོན་མགོན་པོ་རྒྱལ་ལ་སྲས་རིན་ཅེན་ཤེས་རབ། གྲགས་པ་ཡེ་ཤེས། གྲགས་པ་རིན་ཅེན། རིན་ཅེན་སྐྱབས་དང་བཞི་ལས། གྲགས་པ་ཡེ་ཤེས་ནི་ས་སྐྱར་འགྲོ་མགོན་འཕགས་པའི་དྲུང་དུ་འབྱོན་དུས་མདོ་སྡུད་པའི་ཚོད་ཙམ་གྱི་ཕྱག་དཔེ་ཞོགས་རེ་ལ་བཟུང་བས་མཁྱེན་རབ་ཀྱིས་གྲགས་པ་ཆེ། གདན་སར་བཞུགས་རིང་འགྲོ་ཕན་གྱི་སྒོ་མཆོག་ཏུ་ཡངས། ཁྲི་དཔོན་བྱང་གཞོན་གྱི་རྗེས་སུ་གཞོན་ནུ་ཡོན་ཏན་གྱིས་ཁྲི་དཔོན་ལོ་དྲུག་བྱས་ནའང་། ཆང་ནག་ཁོ་ན་དོན་དུ་གཉེར་བས་སྡེའི་འཛིན་ཚུགས་མ་བྱུང་།
གཅུང་གྲགས་པ་རིན་ཅེན་ཐོས་བསམ་སྒོམ་པ་མཐར་ཕྱིན་ཞིང་གདན་སར་