[A:༡༣༡]ལུགས་གཉིས་ཀྱི་བྱེད་པ་མཐུ་དམན་ཞིང་ཁྱད་པར་ཁོང་རང་གིས་ལས་ཀ་ལེན་པར་གོང་མའི་གསེར་ཞལ་ལན་གསུམ་མཐོངབའི་རྒྱལ་དཔལ་སྒྲོལ་མ་སྐྱིད་འཕྲོག་འདོད་པའི་ཆེད་དུ་བསད་ཅིང་། སི་ཏུ་ལ་ཚིག་ངན་བསྐུར་བ་སོགས་ཀྱིས། སི་ཏུས་བླ་ཆེན་ཀུན་བློ་གོང་མའི་གམ་ནས་ས་སྐྱར་བསྙེན་རྫོགས་ལ་བྱོན་པའི་སྡེབས་ཀར་སི་ཏུ་རིན་ཅེན་གྲགས། དཔལ་ལྡན་ཇུ་དབེན་ཧུན་དཔོན་གྱི་དམ་ཁ་ཁྲིམས་ར་དང་བཅས་འབྱོར་འདུག་པའི་དུས་སུ་གཏུག་གཤེར་བྱས། རྒྱལ་མཚན་སྐྱབས་ལས་ཀ་ལས་ཕབ། ཁྱི་ལོ་ཟླ་བ་དགུ་པའི་ཚེས་དགུའི་ཉིན་བཀའ་ཤོག་བཅྭ་ཧུ་རྣམས་བསྒྲགས། བཅུ་བཞི་ལ་སྣེའུ་གདོང་རྩིས་བླངས། གཞོན་ནུ་འོད་གཉེར་པར་བསྐོས་ཀྱང་ཕྱི་ནང་གི་ཞིབ་ཚགས་ཚུལ་དང་མཐུན་པ་མ་བྱུང་ཡང་གཉེར་རྩིས་ལེན་པ་ལས་གཞན་པའི་རྩ་ར་མ་མཛད། འབྲུག་ལོ་ལ་ཨ་ཏུ་ལ་ཡར་ཀླུངས་སུ་བྱོན། ཡུན་རིང་བཞུགས། ཉིན་གཅིག་ཨ་ཏུ་ལས། སི་ཏུ་རྟ་རར་ཁྲིད་ནས་རྟ་བྲེས་ཀྱི་ཁ་ཤིང་གོག་ལ་ཁད་ཅིག་འདུག་པ་དེ་བསྟན་ནས། ཁྲི་དཔོན་བློ་ཞིབ་དགོས་པ་ཡིན། འདི་ལ་ས་ཕག་གསུམ་བཞག་ན་འགྲིག་པས། རྟ་ལ་སྣད་ཡར་མི་ཡོང་བ་ཡིན། རྟ་རབ་ལ་དངུལ་བྲེ་རི། དངུལ་བྲེ་དོ་གསེར་སྲང་བརྒྱད་ཡིན་གསུང་བ་སོགས་འཇིག་རྟེན་མི་ཆོས་ལ་དགོས་པའི་བསླབ་བྱ་ཆེ་ཕྲ་དུ་མ་མཛད། དེ་ནས་སྦྲུལ་ལོ་སི་ཏུའི་རབ་ཏུ་བྱུང་བའི་མཁན་པོ་ཚུལ་དར་བའི་དབོན་པོ་འཕྱོང་རྒྱས་པ་ཧོར་གཞོན་ནུ་བཟང་པོ་གཉེར་དུ་བསྐོས། དེ་རྗེས་གཞིས་ཀ་རྣམས་ཀྱི་གསོ་ཕྲན་དང་། ཡུལ་གྲུ་སོ་སོར་སྐྱེ་ཤིང་འཛུགས་པ། གཤམ་ཆུ་ལ་ཟམ་མོ་ཆེ་འཛུགས་པ། སྣེའུ་གདོང་རྩེའི་ཕོ་བྲང་རྒྱ་བསྐྱེད་དེ་རྣམ་པར་རྒྱལ་བའི་ཁང་བཟང་ས་ལ་འཕོས་པ་ལྟ་བུ་མཛད། དེ་ནས་མི་རིང་བར་གཡའ་བཟང་པ་དང་ཁ་མཆུ་མང་དུ་བྱུང་ཞིང་། གཡའ་བཟང་པ་འདི་ཆོས་ཕྱོགས་ནས་ཕག་གྲུའི་སློབ་བརྒྱུད་དང་། འཇིག་རྟེན་ནས་ཧུ་ལ་ཧུར་གཏོགས་པའི་ཕག་གྲུའི་འོག་ཏུ་ཡོང་དགོས་རྒྱུ་ཡིན་ནའང་། ལས་ཀྱི་ཤུགས་ཀྱིས་བདས་པ་ན།