[A:༡༣༢]བློ་ཆེན་ལོག་པའི་ལམ་ལ་འགྲོ། ་། མུ་སྟེགས་བྱེད་ཀྱི་སྟོན་པ་མཆོག་། དབང་ཕྱུག་སྨྱོན་པའི་བརྟུལ་ཞུགས་འཛིན། ། ཞེས་པའི་དཔེ་ལྟར་གཡའ་བཟང་པས་ཕག་མོ་གྲུ་པའི་སྟེང་དུ་དམག་གིས་ཚུར་འགེབས་ལན་འགའ་བྱས་ཤིང་། ཚལ་པ་རྒྱབ་ཕུགས་སུ་ཡོད་པ་དང་། དཔོན་ཆེན་རྣམས་ཀྱང་ཡོ་བས་ཁ་མཆུ་ཡང་གཡའ་བཟང་པ་རྒྱལ་བ་འགའ་རེ་བྱུང་ནའང་། ཁ་མཆུའི་རྩ་བ་མ་ཆོད་པས་གཡའ་ཕག་བར་ཐང་དུ་གཡུལ་འཁྲུགས་པས་ཕག་གྲུ་ཕམ་སྟེ། སྟོན་པ་གཞོན་འོད་ཀྱིས་འགོ་བྱས་མི་གཅེས་བཅུ་གསུམ་ཙམ་བསད་། སི་ཏུ་དང་མཉམ་དུ་གཞོན་ནུ་བཟང་པོས་འགོ་བྱས་མི་བཅོ་ལྔ་ཙམ་མ་གཏོགས་ཕལ་ཆེར་བྲོས། དེ་ནས་དཔོན་ཆེན་དབང་ཕྱུག་དཔལ་བའི་དྲུང་དུ་གཡའ་ཕག་གཏུགས་གཤེར་བྱས་པས་ཕག་གྲུ་བདེན་པ་ཆེ་བ་ཙམ་བྱུང་ཡང་། དཔོན་ཀུན་རྡོར་གྱིས་གྱོག་བྱས་པར་བརྟེན་གཡའ་བཟང་པ་རྒྱལ། དེ་ནས་མི་རིང་བར་དཔོན་ཆེན་དབང་བརྩོན་གྱིས་དོག་ལུམ་པར་སི་ཏུ་སྟོན་མོ་ལ་བོས་ཐོག་ལབ་བསླུས་ཀྱི་རྣམ་པར་སྟག་མགོ་གཏོད་དགོས་པའི་ཚ་འཇམ་ཅི་ཡང་བྱས་ཤིང་། ཞག་བཅུ་དགུ་ཙམ་གྱི་རིང་གུང་ཐང་དུ་བཙོན་ལ་འཇུག་པ་སོགས་བྱས་ཀྱང་། ཤེས་རབ་ལྡན་པ་མགོ་བསྐོར་ཡང་། ། བྱ་བའི་ཆ་ལ་རྨོངས་མི་འགྱུར། ། སྲོག་ཆགས་གྲོག་མ་མིག་མེད་ཀྱང་། ། མིག་ལྡན་གཞན་ལས་ལྷག་པར་མགྱོགས། ། ཞེས་པ་ལྟར་མཁྱེན་རབ་དང་སྙིང་སྟོབས་ཕུལ་དུ་བྱུང་བས། དཔོན་ཆེན་གྱིས་གླགས་མ་རྙེད་པར་ཕྱིར་ཕེབས། དེ་ནས་སི་ཏུ་དར་མ་རྒྱལ་མཚན། མངའ་རིས་ཕྱིན་གྱི་འཇགས་བྱེད་པ་དང་། བོད་ཆོལ་ཁ་གསུམ་གྱི་ཕྱེ་གསལ་བྱེད་པར་བྱོན་དུས། འདམ་དང་ཚོང་འདུས་འགུར་མོ་གཉིས་སུ་གཏུག་གཤེར་བྱེད་མི་ཐུབ་ཀྱང་། མངའ་རིས་འཁོར་ནས་ཡར་ཀླུངས་སུ་སེ་ཆེན་རྒྱལ་པོའི་འཇའ་སྭ་ལི་ཇི་བཅྭ་ཧུ་སོགས་ཡིག་རིས་རྣམས་བསྟན་པས་སི་ཏུ་དར་རྒྱལ་བ་ཧ་ལས། གཡའ་ཕག་གི་ཁ་མཆུའི་བཅད་མཚམས་ལེགས་པ་བྱས་ནའང་། གཡའ་བཟང་ཚུལ་འབུམ་འོད་