[A:༡༣༠]ཐོག་ནས་མ་ལྷུངས་པ་ཁོའི་དྲིན་ཡིན་གསུང་། ས་སྐྱར་ཕེབས་སྐབས་དྲུང་འཁོར་རྣམས་ཆང་གི་དགའ་སྟོན་བྱེད་པར། བྲང་ཁང་ཤར་ན་སི་ཏུ་བད་ཡོད་པར་བདག་ཆེན་པའི་སྐུ་གཞོགས་ནས་འབོད་མཁན་བསྟུད་མར་གནང་བྱུང་བ་ལ་བྱོན་པས། གསོལ་རས་གསེར་གྱི་ཐེབ་རྩེའི་ནང་དུ་གནང་ཆས་མེད་པར་ཕྱག་རྗེན་པས་བཟུང་ཆོག་པའི་དགྱེས་པའི་བཀའ་སྩལ་ཞབས་གོམ་འཁྱོར་བ་ཙམ་ཡོད་ནའང་ཐུགས་རུས་མཛད་དེ་གསོལ། བདག་ཆེན་རིན་པོ་ཆེ་མངོན་མཁྱེན་ཐོགས་མེད་མངའ་བས། སི་ཏུ་ལ། ཁྱེད་ལ་ཁྲི་དཔོན་ཡོང་གཡུལ་རྒྱལ་སློབས་གསུངས་པ་སོགས་མ་འོངས་པ་མཁྱེན་པའི་གསུང་མང་དུ་མཛད། དེའི་རྒྱུ་མཚན་གྱིས་བཀའ་ཆེམས་སུ། བླ་མ་བདག་ཆེན་པའི་དྲུང་དུ་ཐུགས་ལ་དཔེ་མེད་བཏགས་པ་དེ་ངའི་བསོད་ནམས་ཆེན་པོ་ཡོད་པ་འདི་མཁྱེན་པར་འདུག་བསམ་པའི་དག་སྣང་དང་མོས་གུས་བསམ་གྱིས་མི་ཁྱབ་པ་ཡོད་གསུང་། སྟོན་ཆོས་ཐོག་བླ་མ་མཉམ་མེད་པའི་དྲུང་དུ་བརྟག་གཉིས་ཀྱི་གསན་སྦྱོང་མཛད་སྐབས། སློབ་དཔོན་ནམ་བློ་དང་མ་འཆམ་པའི་ཚིག་རྩོད་ཀྱི་གཏམ་བླ་མས་གསན་པས། ཁྱེད་ཚོ་རླུང་གིས་བདས་པའི་བྱེ་རི་ཡིན། ཕག་གྲུ་དཔོན་པོ་སྲིད་པས་བསྐོས་པའི་གངས་རི་ཡིན་གསུངས་སྐད། དེ་ནས་རྟ་ལོའི་ལོ་གསར་ལ་རིན་ཅེན་སྒང་དུ་དཔོན་ཆེན་རིན་ཅེན་སེངྒེའི་རྩར་བྱོན་པས་འབྲུམ་པས་བསྙུང་དེ་དྲག་པ་དང་། འཇད་དུ་ཟླ་བ་གསུམ་བཞི་སྐོར་བཞུགས། དེ་ནས་དབུས་སུ་འབྱོན་ཁར་བདག་ཆེན་རིན་པོ་ཆེའི་དྲུང་དུ་ཕྱག་འབུལ་ལ་བྱོན་པས། བླ་མ་མཁས་བཙུན་པ་དང་། སི་ཏུ་གཉིས་ཕྱག་སྦྲེལ་ནས་མཁས་བཙུན་པས་སི་ཏུ་བའི་མགོ་གཉེར་དང་། སི་ཏུས་མཁས་བཙུན་པའི་ཞབས་ཏོག་ཏུ་འགྱུར་བ་བྱེད་དགོས་པའི་གསུང་ནན་ཆེ་བ་བྱོན། དེ་ནས་དབུས་སུ་བྱོན་ཏེ་མི་རིང་བར་གོང་མ་རྒྱལ་པོས་སྟག་མགོ་ནོར་བུ་གསུམ་པ་དང་བཅས་ཁྲི་དཔོ་ན་གྱི་ལས་ཀ་གནང་། ཁྱི་ལོ་ཟླ་བ་བརྒྱད་པའི་ནང་ཚུན་དུ་རྒྱལ་མཚན་སྐྱབས་ཀྱིས་ཁྲི་དཔོན་བྱས་ནའང་།