[A:༡༣༣]ཀྱིས། ཨེ་གཉལ་གྱི་དམག་རྣམས་བསྐུལ་ཏེ་རྡོག་པོ་རྒྱུད་དུ་འཁྲུགས་པས་ཕག་གྲུ་རྒྱལ་ཏེ། མ་དགའ་དགྲ་དགས་འགོ་བྱས་མི་ཉི་ཤུ་ཙམ་བསད་ཀྱང་། གཡའ་བཟང་པས་འབྲས་མོའི་ནང་དུ་གཞོན་ནུ་བཟང་པོ་དཔོན་གཡོག་གི་སྟེང་དུ་བཀབ་པར། སི་ཏུ་དཔོན་གཡོག་གིས་འགོ་དམངས་འབྱོར་ཏེ། གཡའ་བཟང་པའི་དམག་རྣམས་ཕྱིར་བྲོས། གཡའ་བཟང་དགོན་པ་དང་གཞིས་ཀ་རྣམས་རྩིས་བླངས།
དེ་ནས་ས་སྐྱར་བླ་མ་ཀུན་སྤངས་པ་དང་། དཔོན་ཆེན་རྒྱལ་བཟང་བ་གཉིས་ཀྱིས་སི་ཏུ་གསོད། སྣེའུ་གདོང་རྩིས་ལེན་པའི་གྲོས་ངན་བཤམས་པ་རིམ་གྱིས་མཆེད་ནའང་། སྔར་ནས་ས་ཕག་གཉིས་འབྲེལ་ཟབ་ཅིང་། ཁྱད་པར་སི་ཏུ་རང་བདག་ཉིད་ཆེན་པོ་བཟང་པོ་དཔལ་བའི་དྲུང་འཁོར་ཡིན་པའི་སྟབས་ཀྱིས། དཔོན་ཆེན་ལ་དགྲ་དཔང་མཆོངས་བྱེད་པའི་རྩིས་ཡོད་སྐབས། དཔོན་ཆེན་རྒྱལ་བཟང་པ་དབུས་ཕྱོགས་སུ་བྱོན་ཏེ་རིམ་གྱིས་ཡར་ཀླུངས་སུ་ཕེབས། སང་གཡའ་ཕག་གཉིས་གཏུག་གཤེར་བྱེད་རྒྱུའི་ཉིན། སི་ཏུ་བས་གཞོན་ནུ་བཟང་པོས་འགོས་བྱས་བློན་པོ་རྣམས་ལ། སང་ངེད་དང་གཡའ་བཟང་པ་གཉིས་ཁྲི་དཔོན་གྱི་མདུན་དུ་གཏུག་གཤེར་བྱེད་རྒྱུ་ཡིན་པས། མ་ངེས་པའི་དཔོན་ཆེན་གྱིས་ངེད་བཟུང་བ་བཞིན་བྱུང་ན་ངེད་ཀྱི་ལྤགས་པ་དམར་བཤུས་བྱེད་ཀྱིན་འདུག་ཟེར་བ་བྱུང་ཡང་། སྣེའུ་གདོང་མ་གཏོང་སོགས་ཀྱི་བསླབ་སྟོན་རྣམས་མཛད། སང་དཔོན་ཆེན་གྱིས་སི་ཏུ་བཟུང་ཀྱང་ཐེལ་རྩེ་མེ་ལ་བསྲེགས་པས་ཡི་གེ་ལེན་རྒྱུ་མ་བྱུང་། དེ་ནས་དཔོན་ཆེན་གྱིས་སྣེའུ་གདོང་དུ་བསྐོར་གཡང་བྱས་པར་བློན་པོ་རྣམས་ཀྱིས་ཞལ་ངོ་ལས་སྡེ་སྲིད་གལ་ཆེ་ཟེར་ནས་མ་གཏད། དེ་ནས་དཔོན་ཆེན་གྱིས་སི་ཏུ་ལ་ཀོ་ཤ་བརྒྱ་དང་སུམ་ཅུ་རྩ་ལྔ་ཙམ་བརྒྱབ། ཞྭ་རྔ་མ་ཅན་གཅིག་དབུ་ལ་བསྐོན་པ་སོགས་བཙོན་ཆས་ཀྱི་རྣམ་པས་ཡར་ཁྲིད་སྐྱི་ནག་བར་དུ་ཚལ་པའི་དམག་གིས་བསྐྱལ་བས་ཁ་ངན་གཏོང་བ་དང་