[A:༡༣༤]འདེད་དྲག་བྱས། ཆེན་པོ་རེ་ཞིག་གུད་གྱུར་ཀྱང་། ། དེ་ལ་གདུང་བ་སྐྱེ་མི་དགོས། ། ཟླ་བ་རེ་ཞིག་གཟས་ཟིན་ཀྱང་། ། དེ་མ་ཐག་ཏུ་གྲོལ་བར་འགྱུར༎ ་ཞེས་པ་ལྟར། ཉུག་ཆོས་རྫོང་དུ་ཟླ་བ་ཕྱེད་གཉིས་དང་། ཀོ་སྦྲེལ་དུ་ཟླ་གཅིག་བཞུགས། དེ་ནས་བོ་དོང་དུ་དཔང་ལག་གི་ཐོག་དཔོན་ཆེན་དབང་བརྩོན་འཇའ་ས་དང་བཅས་མཐོང་སྨོན་དུ་སླེབ་པ་དང་། དཔོན་ཆེན་རྒྱལ་བཟང་གིས་སི་ཏུ་ལ་དམ་སྦྲགས་མ་བྱས་པར་སི་ཏུ་དབུས་སུ་བྱོན། སྣེའུ་གདོང་དུ་གཞོན་ནུ་བཟང་པོས་འགོ་བྱས་བློན་པོ་རྣམས་ལ་ཁ་མཆུ་འདིའི་དབྱེ་གསལ་མ་བྱུང་བར་ཆོས་བྱེད་པ་སྐད་མི་ཟེར་བའི་ཁས་ལེན་བསྐོར། དེ་ནས་དཔོན་ཆེན་དབང་བརྩོན་གྱིས་ཁྲི་དམག་རྣམས་བསྡུས་ཏེ་དོག་ལུང་པར་བྱུང་བ་དང་། སི་ཏུས་ཀྱང་རྫོང་རྣམས་ཀྱི་འཛིན་ཆ་དང་དཔུང་གི་བསྡུ་གསོག་མཛད། བྱང་གི་ལ་ཁར་ཁྲོམ་པོ་ལྷ་བཙུན་དཔོན་གཡོག་བརྒྱ་སྐོར་དང་། དཔོན་ཆེན་གྱི་དམག་རྣམས་ཐུག་པ་ལྷ་བཙུན་པ་ཅན་ལག་དཔངས་མཐོ་བར་བྱུང་བའི་གཏམ་སྙན་པ་སླེབ། སང་གཞོན་ནུ་བཟང་པོས་དམག་དཔོན་བྱས་ཏེ། ཕག་གྲུ་ཁྲི་བསྐོར་གྱི་དམག་རྣམས་བཏེག་ལྷུམ་སྟེང་དུ་དྲོ་ལ་སླེབ། དེར་རྟ་རྣམས་སྒུགས་ཁ་སླངས། བབ་ཅོལ་དུ་སྤྱོད་པ་མ་ཡིན་པར་དཔའ་བོ་དམག་ལ་ཆས་པ་སྟག་ལྟར་མཆོང་བ་ལ་མེད་མི་རུང་གི་མི་བཞིའི་ནང་གི་ཐུག་དཀར་བས་ལྷ་གསོལ། གཡུལ་རྒྱལ་བས་ལྟོ་བསྒྱུར། དུས་ཚོད་རྩིས་དང་བསྟུན་ནས་དཔུང་རྣམས་འགྲིམས། དཔོན་ཆེན་གྱིས་ཁྲི་དམག་མོན་མཁར་མདའ་ན་རུ་བསྒྲིགས་པའི་སྟེང་དུ་བཀབ་ནས་འཁྲུགས་པས་ས་སྐྱ་པའི་དབུས་གཙང་གི་ཁྲི་དམག་མཐའ་དག་སྤུབ། ཕག་གྲུ་པའི་ཇུས་རྣམ་པར་རྒྱལ་བའི་རུ་མཚོན་སྲིད་རྩེའི་བར་དུ་བསྒྲེང་ནས། དགྲ་མགོ་རུ་དར་དང་བཅས་ཕོ་བྲང་ཆེན་པོ་སྣེའུ་གདོང་རྩེར་ལག་རྟགས་སུ་བསྐུར་བས་ཀུན་གསལ་སྒེག་མོ་རླུང་གི་རྒྱལ་མཚན་གྱི་གོས་གྱོན་པ་ལྟར་རྣམ་པར་བཀྲ་བའི་དར་གྱི་ལྷབ་ལྷུབ་དང་གྲགས་སྙན་རྫ་རྔའི་སྒྲ་ཆེན་པོས་ནམ་མཁའི་ནོར་བུ་ཡང་སྐྲག་ནས་གླིང་བཞི་