[A:༡༣༥]བསྐོར་བའི་ཟོལ་གྱིས་རྒྱུ་བར་བྱས་སོ༎
སྔར་དཔོན་ཆེན་རྒྱལ་བཟང་གིས་སི་ཏུ་བཟུང་བའི་སྐབས་ཕོ་བྲང་ཆེན་པོར་འཁྲ་ཕུར་ཚུགས་ཤིང་། ཉེ་ལམ་དབང་བརྩོན་གྱིས་ཁྲི་སྐོར་བཅུ་གསུམ་གྱི་དཔུང་བཤམས་པ་བཏུལ་བ་སོགས་གཞན་སྡེ་རྣམ་པར་འཇོམས་པའི་དགྲ་ཐབས་ཀྱིས་སྡེ་སྲིད་ཕག་མོ་གྲུ་པའི་བསྟན་ཇུས་ཚུགས་པའི་རྩ་བ་ལྟ་བུ་ཧོར་གཞོན་ནུ་བཟང་པོ་ཡིན་པས། བཀའ་ཆེམས་སུ། སྣེའུ་གདོང་དགྲ་ལག་ཏུ་མ་ཤོར་བ་བྱུང་བས་ངའི་སྲོག་ཐོན། དེ་ལ་བརྟེན་ནས་སྡེ་འདི་ཟུག་ཆགས་བྱུང་བས་ཁོ་དྲིན་ཆེ་བ་ཡོད་པའི་དོན་དེ་ཡིན་ཞིང་། ད་དུང་ཚུན་བཅད་དུ་ང་ལ་སྔས་གཏོད་པ་འདི་ཡིན་པས་ཤི་གསོན་གང་བྱུང་ཡང་ནང་ནས་བསྡུར་དགོས། ད་ལྟའང་གཞོན་ནུ་རྒྱལ་མཚན་གྱིས་འགོ་བྱས་སྤུན་སྐྱ་སེར་ཀུན་ལ་བློ་ཐུབ་དང་། ནང་མི་འཆེལ་བའི་དོན་དེ་ཡིན་གསུངས་ལ། དེ་ནས་སི་ཏུ་རང་ཡང་དཔུང་ཐོག་ཏུ་ཕེབས། གྲ་ཕྱི་འཕྱོང་རྒྱས་སོགས་ལྷོ་རྒྱུད་ཀྱི་ས་ཆ་རྫོང་གཞིས་ཕལ་ཆེར་བླངས། འཐབ་རྩོད་སྔ་ཕྱིར་བྱུང་ཡང་གཞན་དག་རྣམས་རྨེག་མེད་པར་བཅོམ། དེ་ནས་དཔོན་ཆེན་དབང་བརྩོན་གྱིས་དམག་བསགས་པར་བླ་མ་དམ་པས་བཀའ་ཕེབས་དང་། དེ་རྗེས་ཁ་མཆུ་བསྡུམ་མཁན་མང་དུ་བྱུང་ཡང་། དཔོན་ཆེན་གཞན་གྱིས་བསྐྱོད་སྟབས་སུ་སོང་བས་མ་འགྲིག་པའི་ཟིར་བུན་གྱི་ངང་ལ་སི་ཏུས་གོང་དཀར་བླངས། དེ་ལ་དཔོན་ཆེན་གྱི་དཔུང་བཅུག་པར་བསད་བཟུང་ཚུལ་ལྕེབས་པ་སོགས་མང་དུ་བྱུང་ནས་སི་ཏུ་བ་རྒྱལ་ཏེ། ཁ་རག་ཕྱིན་གཙང་ལ་ཡར་གཏོགས་ལྷ་འབྲུག་རྣམས་རྟ་རྨིག་འོག་ནས་བླངས། དབེན་པ་དང་མཇལ་ཏེ་གོང་མའི་དྲུང་དུ་ཁྱེད་རང་འགྲོའམ་མི་གཏོང་བ་གང་རིས་འཐད་གསུངས་པ་བཞིན་དབང་ཕྱུག་དང་ཤེས་རབ་རྡོ་རྗེ་གཉིས་བཏང་བ་ཉེས་མེད་དུ་འཁོར་ཏེ་ཁྲི་བསྐོར་ལ་དགོས་པའི་དངུལ་གྱི་དམ་ཁ་དང་བཅྭ་ཧུ་སོགས་འགྲུབ།
དེ་ནས་འབྲི་གུང་སྒོམ་པ་ཀུན་རྡོར་གྱིས་སྔ་ཕྱིར་བྱེད་སྤྱོད་མ་མཁས་པ་ལ་