[A:༡༣༧]ཆེན་བཙོན་ནས་བཏོན། གཙང་གི་ས་ཆ་ཕལ་ཆེར་ཆབ་འོག་ཏུ་བཅུག་སྟེ། ཕྱིར་འབྱོན་པའི་ལམ་ཞོར་དུ་གཞིས་ཀ་རིན་སྤུངས་རྩིག་པའི་ཞལ་བཀོད་མཛད།
དེ་ཡང་དུས་སྐབས་འདི་དག་ཏུ་ས་སྐྱ་པ་ཞལ་ངོ་མང་བས་བླ་བྲང་གོ་བཞིར་གྱེས་ནས་ནང་མི་མཐུན་པ་སོགས་ཀྱིས་བསྟན་ཇུས་མཐའ་དག་ཕག་གྲུ་པའི་འོག་ཏུ་ཤོར་བ་ནི། ས་ནང་གྲུམས་ནས་ཕག་གིས་ས་རློག་འཇིག་། ཡར་ཀླུངས་ནང་ནས་ཕྱག་རྡོར་སྤྲུལ་པ་འབྱུང། ། ཞེས་པའི་ལུང་བསྟན་གྱི་དོན་དང་མཐུན་པར། གོང་མ་ཏའི་སི་ཏུ་འདི་ཉིད་ནི་གསང་ཆེན་རྡོ་རྗེ་ཐེག་པའི་བཀའི་བསྡུ་བ་པོ་རྗེ་བཙུན་ཕྱག་ན་རྡོ་རྗེའི་གསང་བ་གསུམ་གྱི་རྨད་དུ་བྱུང་བའི་ཟློས་གར་ལས། ཆོས་ཀྱི་རྒྱལ་པོ་མེས་དབོན་གསུམ་གྱི་མཛད་པའི་སྣང་བརྙན་དྲི་མས་ཅུང་ཟད་སྦགས་པ་བསལ་བའི་སླད་དུ་དབུས་གཙང་རུ་བཞིའི་རྒྱལ་ཁམས་ལ་སྟོབས་ཀྱིས་མངའ་སྒྱུར་བར་གནམ་གྱི་ལུང་གིས་སྤྱི་བོ་ནས་དབང་བསྐུར་བར་གོར་མ་ཆག་དེ་ནས་གོང་མ་རྒྱལ་པོས། ད་ར་ཁ་ཆེ་སོགས་གསེར་ཡིག་པ་མངགས་ཏེ་ཏའི་སི་ཏུའི་མིང་དང་དམ་ཁ་གནང་།
དེ་ནས་འབྲི་གུང་པས་ཕག་གྲུའི་སྟེང་དུ་དམག་ཚན་ཆེར་བསགས་པར་བརྟེན། སི་ཏུས་གོང་དཀར་གྱི་དམག་རྣམས་བཏང་སྟེ་བྲག་དཀར་ཕབ། དེ་སྐབས་ས་སྐྱར་བླ་མ་ཀུན་སྤངས་པ་བཀྲོངས་པ་སོགས་ནང་འཁྲུག་བྱུང་བས། ཁ་མཆུ་ལབ་པར་སི་ཏུ་གཙང་དུ་བྱོན། དཔོན་ཆེན་རྒྱལ་བཟང་འབོད་པར་གཏང་བ་ཁོང་ལྷ་རྩེར་བཀའ་གྲོས་ལ་བྱོན་ཐོག་དཔོན་ཆེན་དབང་བརྩོན་དང་མཁན་པོ་ནམ་མཁའ་ཡེ་ཤེས་ཀྱིས་དུག་བཏང་ཡང་ཟེར། ཨ་རག་མང་བས་ལན་ཀྱང་ཟེར། གང་ལྟར་དཔོན་ཆེན་གྲོངས། དེ་ནས་སི་ཏུས་ས་སྐྱས་གཙོས་པའི་ཆེ་གཉན་རྣམས་ཀྱི་བཅྭ་ཚེ་བླངས་མཇུག་བསྡོམས་སུ་ས་སྐྱར་བྱོན། བཅྭ་ཚེའི་ནང་དང་འགལ་བ་བྱུང་ན་རྩ་ར་གཏོང་བའི་ཁྲིམས་བསྒྲགས། ལྷ་ཁང་ཆེན་མོར་རིན་ཅེན་འོད་ཀྱིས་འགོ་བྱས་བརྒྱ་སྐོར་ཞིག་ཟུག་བཞག་ས་སྐྱའི་ལོ་རྒྱུས་ན་འདི་