[A:༡༣༨]སྐབས་རྫོང་ཆུང་པ་གཟུངས་ཀྱི་དཔལ་བས་སི་ཏུ་ལ་མངོན་སྤྱོད་ཀྱི་ལས་མཛད་པས་མཚན་མ་ཁྱད་པར་ཅན་བྱུང་སྐད། དེ་ནས་སི་ཏུ་དབུས་སུ་བྱོན་རྗེས་ལྷ་རྩེ་པ་དང་བྱང་པ་འཁྲུགས། དེ་ལ་བཅྭ་ཚེ་དང་མཐུན་པའི་རྩ་ར་གཏོང་བར་ཆེན་པོས་གཙོས་པའི་དམག་བརྫངས་པ་སྙི་ཚར་སླེབ་དུས་ལྷ་རྩེ་ནས་དཔོན་ཆེན་དབང་བརྩོན་གྱི་དཔུང་གིས་ས་སྐྱ་ལྷ་ཁང་ཆེན་མོར་བསྐོར་བ་ཐོས་པས་དཔུང་རྣམས་སྙི་ཚར་ནས་ས་སྐྱར་ཕྱིན་ཏེ་འཁྲུགས་པས་མང་དུ་བསད་། དཔོན་ཆེན་བཟུང་། བཞི་བརྒྱ་སྐོར་ལ་ཁྲིམས་ལུགས་བྱས། དེ་ནས་ཏི་ཤྲི་ཀུན་དགའ་རྒྱལ་མཚན། སློབ་དཔོན་བསོད་ནམས་བློ་གྲོས། གཡའ་བཟང་ཁྲི་དཔོན། ཚལ་པ་ཁྲི་དཔོན་སོགས་ཀྱིས་གོང་སར། སི་ཏུས་ས་སྐྱ་དམག་གིས་བཅོམ། ཁྲི་དཔོན་གཞན་རྣམས་ལ་མཐར་འདེད་བྱས་སོགས་ཀྱི་ཞུ་ལོག་རིམ་པར་ཕུལ་བར་བརྟེན། གོང་མ་ཐུགས་ཚོམ་པ་སེལ་བའི་ཆེད་དུ། དྲུང་ཆེན་ཤེས་རབ་བཀྲ་ཤིས་ཀྱིས་སེང་གེ་དཀར་མོའི་པགས་པ་སྡེར་བཞི་མ་ཉམས་པས་གཙོས་པའི་འབུལ་བ་དང་བཅས་གོང་མའི་སྐུ་གཞོགས་སུ་བཏང་བས། གདུང་རབས་ནས་གདུང་རབས་སུ་ཕན་པའི་འཇའ་ས་དང་ལུང་བཟང་པོ་འགྲུབ། དེ་ལྟར་འབྲི་ཚལ་གཡའ་བཟང་ས་སྐྱའི་དཔོན་ཆེན་སོགས་སྟོབས་སྦྱོར་དྲེགས་པས་མྱོས་པའི་རྒོལ་བའི་ཀླན་ཀ་ཅན་རྣམས་ལ། ཅེ་སྤྱང་དུས་མིན་དུ་ང་རོའི་སྐད་འབྱིན་པར། གདོང་ལྔའི་དབང་པོ་དགྲ་ཟླར་མི་སེམས་པའི་ངང་ཚུལ་བཞིན་མཛད་ཀྱང་། ཚུར་འགེབས་ཀྱི་བྱེད་པ་དུག་སྦྲུལ་སྒོང་འཁྱེར་གྱི་སྣང་ཚུལ་ལ་བརྟེན་ནས་གཞན་སྡེའི་མངའ་ཐང་ཐམས་ཅད་དཔུང་ཤེད་ཀྱིས་བཅད་ནས་ནུབ་ཕྱོགས་ཆུ་ལྷའི་མཐར་ཐུག་གི་བར་དུ་བཀའ་རྟགས་ཀྱི་ཕྱག་རྒྱ་བཙན་པོས་གསེར་གྱི་གཉའ་ཤིང་ལྟ་བུར་ལྕི་བའི་རྒྱལ་ཁྲིམས་ཀྱི་འོག་ཏུ་བཅུག་སྟེ། ཉི་འོག་གི་རྒྱལ་ཕྲན་མཐའ་དག་གིས་ཡུལ་སྲོལ་དང་མཐུན་པའི་ནོར་གྱི་དཔྱ་འབུལ་བ་སོགས་མདོར་ན་བསིལ་ལྡན་གངས་ཀྱི་ར་བ་དར་དཀར་གྱི་ཡོལ་བས་བྲེས་པའི་ཁོངས་སུ་འཁོད་པའི་སྐྱེ་རྒུ་མཐའ་དག་མི་