[A:༡༤༠]སྨྱོན་ཧམ་མནའ་དག་གི་ཞལ་ལྕེ། བརྐུས་པ་འཇལ་གྱི་ཞལ་ལྕེ། ཉེ་འབྲེལ་འབྲལ་བཟླུམས་ཀྱི་ཞལ་ལྕེ། བྱི་བྱས་བྱི་རིན་གྱི་ཞལ་ལྕེ། ནམ་བར་ཚུར་གྱི་ཞལ་ལྕེ་སྟེ་བཅོ་ལྔའི་སྒོ་ནས་གཏན་ལ་ཕབ། དེ་ཡང་མི་བསྲུན་ལོག་པར་འཁུ་བའི་དགྲ་སྡེ་ཚར་བཅད་ནས། ཇུས་དོན་བཞེད་ཐོག་ཏུ་འཁྱོལ་བའི་ཐབས་སུ་དྲག་པོ་དཔུང་གི་སྦྱོར་བ་བཤམས་ཚུལ། ཚུར་འགེབས་ལ་བཙན་པོའི་རྫོང་ལ་འཁྲ་འཕུར་བྱེད་ཚུལ། སྣེ་མོར་མངགས་སླེབ་རྣམས་ཀྱིས་རྣམ་དཀར་གྱི་ལས་ལ་སྤྱོད་ཅིང་ཉེ་འགྱང་སྤངས་པའི་གཞུང་དོན་གཙོ་བོར་བྱེད་ཚུལ། མི་བསད་ལ་ལན་འཇལ་གྱི་གཉིས་ཕུང་སྡིག་ལས་བྱེད་དུ་མི་འཇུག་པར་སྟོང་སྤྲོད་ལེན་སོགས་ཕྲ་ཞིབ་མཛངས་པའི་བློས་ཁྲིམས་ཀྱི་འཇམ་དར་ཡུག་གཅིག་ཏུ་བརྐྱངས་པའི་འཛུམ་གྱིས་རྫོགས་ལྡན་གསར་པའི་མགྲོན་རིང་ནས་འགུགས་པར་མཛད་དོ༎ སྨྲས་པ།
འཇིགས་བྲལ་སྲ་བརྟན་གཡུལ་ངོར་དཔའ་བའི་རུ་མཚོན་རྩེ་ལ་དགྲ་སྡེའི་སྲོག་དབུགས་བླངས་པ་ན༎
གསེར་ལྡན་རུས་དཀར་ཁྱབ་པའི་མདངས་ཀྱིས་ཟླ་གཞོན་སྐྲག་སྟེ་བྱང་གླིང་ངོས་ཀྱི་མཁའ་ལ་བྲོས༎
ཁྲག་གི་རྦ་རླབས་འཕྱུར་བའི་འོད་དམར་གཟི་ཡིས་རྒོད་མ་ཁ་དེ་རྒྱ་མཚོའི་འགྲམ་དུ་ཡིབས༎
རྣམ་པར་རྒྱལ་བའི་རྫ་རྔ་ལྡིར་བས་སུམ་རྩེན་བདག་པོ་འདུད་པར་གྲོས་པའི་ཅ་ཅོ་གླེང་༎
ཨེ་མ་རྩོད་པའི་དུས་འདིར་སུ་ཝ་རྞའི༎
འཁོར་ལོ་ནམ་མཁར་འཕགས་པའི་རྒྱལ་ཐབས་ཀྱིས༎
གྲགས་སྙན་དུ་ཀཱུ་ལ་ཡི་བ་དན་དཀར༎
སྲིད་པའི་རྩེ་མོར་ཁྱབ་ཅེས་ལྷ་རྣམས་སྒྲོག།