[A:140]smyon ham mna' dag gi zhal lce/ brkus pa 'jal gyi zhal lce/ nye 'brel 'bral bzlums kyi zhal lce/ byi byas byi rin gyi zhal lce/ nam bar tshur gyi zhal lce ste bco lnga'i sgo nas gtan la phab/ de yang mi bsrun log par 'khu ba'i dgra sde tshar bcad nas/ jus don bzhed thog tu 'khyol ba'i thabs su drag po dpung gi sbyor ba bshams tshul/ tshur 'gebs la btsan po'i rdzong la 'khra 'phur byed tshul/ sne mor mngags sleb rnams kyis rnam dkar gyi las la spyod cing nye 'gyang spangs pa'i gzhung don gtso bor byed tshul/ mi bsad la lan 'jal gyi gnyis phung sdig las byed du mi 'jug par stong sprod len sogs phra zhib mdzangs pa'i blos khrims kyi 'jam dar yug gcig tu brkyangs pa'i 'dzum gyis rdzogs ldan gsar pa'i mgron ring nas 'gugs par mdzad do// smras pa/
'jigs bral sra brtan g.yul ngor dpa' ba'i ru mtshon rtse la dgra sde'i srog dbugs blangs pa na//
gser ldan rus dkar khyab pa'i mdangs kyis zla gzhon skrag ste byang gling ngos kyi mkha' la bros//
khrag gi rba rlabs 'phyur ba'i 'od dmar gzi yis rgod ma kha de rgya mtsho'i 'gram du yibs//
rnam par rgyal ba'i rdza rnga ldir bas sum rtsen bdag po 'dud par gros pa'i ca co gleng //
e ma rtsod pa'i dus 'dir su wa rNa'i//
'khor lo nam mkhar 'phags pa'i rgyal thabs kyis//
grags snyan du kU la yi ba dan dkar//
srid pa'i rtse mor khyab ces lha rnams sgrog/