[A:༡༤༡]གོང་མའི་ལུང་གིས་གཙུག་ན་ཟླ་བའི་མཆོག།
ཐོབ་པས་སྟོབས་ལྡན་འགྲོ་སྐྱབས་གསེར་ཅན་འགའ༎
དཔའ་མཛངས་སེང་གེའི་སྡེར་མོས་བསད་པ་ན༎
པད་དཀར་མིག་ཅིག་གཉིས་པ་ས་འདིར་སྣང་༎
དེ་ནས་དྭགས་པོ་བཀའ་བརྒྱུད་ཀྱི་ཕྱོགས་སུ་མདོ་ཕྱོགས་ཀྱི་བཤད་གྲའི་སྲོལ་མེད་པ་གསར་དུ་བཏོད་པའི་ཆེད་དུ་ཆོས་གྲྭ་ཆེན་པོ་རྩེས་ཐང་བཏབ། ཕར་ཚད་སོགས་བཀའ་པོ་ཏི་དུ་མ་ལ་རིགས་ལམ་ནས་དྲངས་པའི་བཤད་ཉན་བཙུགས། དེ་དང་ཐེལ་གྱི་སྒོམ་གྲྭ་གཉིས་ཀ་ལ་ཕུན་སུམ་ཚོགས་པའི་མཐུན་རྐྱེན་སྦྱོར་བ། བདེ་བར་གཤེགས་པའི་སྐུ་བརྙན་དུ་མ་དང་། གསེར་གྱི་བཀའ་འགྱུར་རོ་ཅོག་བཞེངས་པ། ར་ས་འཕྲུལ་སྣང་དང་བསམ་ཡས་ཀྱིས་མཚོན་པའི་གནས་ཆེན་ཁྱད་འཕགས་རྣམས་ལ་མཆོད་འབུལ་སོགས་ཐར་པ་དང་ཐམས་ཅད་མཁྱེན་པའི་ལམ་བླ་ན་མེད་པ་བསྒྲུབས་པའི་ཚོགས་གཉིས་ཀྱི་ཆུ་གཏེར་ཆེན་པོ་དབྱར་མཚོ་ལྟར་གྱུར་པའི་མཐུས་དཀར་ནག་གི་ལས་ཀྱི་འབྲས་བུ་ཆོས་ཐམས་ཅད་རྗེན་པར་འཆར་བའི་ཚད་མའི་སྲང་ལ་གཞལ་བས། ནག་པོའི་འབྲས་བུས་ཆ་ཙམ་དུ་ཡང་མ་གྱུར་པས། དགེ་ལེགས་ཆུ་ཟླའི་འོད་དཀར་གྲངས་མེད་པ་སྤྲོས་པས་མངོན་པར་མཐོ་བ་དང་ངེས་པར་ལེགས་པའི་གང་བུ་ཡོངས་སུ་སྨིན་པས་ནོར་འཛིན་གྱི་བུ་མོ་མངལ་ཁུར་གྱིས་ལྕི་བར་མཛད།
འདི་ཉིད་གཤེགས་རྗེས་འཇམ་དབྱངས་གུ་ཤྲི་ཆེན་པོ་ནི་དཔོན་བསོད་ནམས་བཟང་པོའི་ཇོ་མོ་ཉི་རུ་མ་དང་མང་ཉམ་གཉིས་ལས་སྔ་མ་ལ་ཉིད་དང་བདག་པོ་ཤཱཀ་རིན་པ་གཉིས། ཕྱི་མ་ལ་དཔོན་རིན་རྡོར་འཁྲུངས་པ་ལས། འཇམ་དབྱངས་པ་བླ་མ་ཀླུ་ལུང་གྲགས་པ་ལ་ཀློག་ཡིག་བསླབས། ཆོས་བཞི་གྲགས་པ་རྒྱལ་མཚན་གྱི་དྲུང་དུ་དགེ་བསྙེན་གྱི་སྡོམ་པ་མནོས། སློབ་དཔོན་