[A:༡༤༤]རྣམ་པར་སྤྲུལ་པ་དེ་ཉིད་ཁབ་ཏུ་བཞེས་པའི་སྲས་མིའི་དབང་པོ་གྲགས་པ་རྒྱལ་མཚན། དྲུང་བྱང་ཆུབ་རྡོ་རྗེ། སྤྱན་སྔ་བསོད་ནམས་བཟང་པོ། སྤྱན་སྔ་དཔལ་ལྡན་བཟང་པོ། སྤྱན་སྔ་བསོད་ནམས་རྒྱལ་མཚན། དྲུང་སངས་རྒྱས་རྒྱལ་མཚན་རྣམས་སྐུ་བལྟམས་པ་ལས།
མིའི་དབང་པོ་གྲགས་པ་རྒྱལ་མཚན་ནི། འཇམ་དབྱངས་ཆེན་པོའི་སྐུའི་སྐྱེ་བ་གསལ་བར་དྲན་ཞིང་། མཁྱེན་རབ་མཆོག་ཏུ་ཡངས་པས་ཀློག་ཡིག་སོགས་ཆེད་གཉེར་དུ་བསླབ་སྦྱངས་མ་དགོས་པར་འབད་མེད་དུ་མཁྱེན། མཁན་པོ་གཞོན་དབང་པའི་དྲུང་དུ་རབ་ཏུ་བྱུང་། སྤྱན་སྔ་གྲགས་པ་བྱང་ཆུབ་ལ་ཆོས་ཁྲིད་རྣམས་རྫོགས་པར་གསན། མཚན་གྲགས་པ་རྒྱལ་མཚན་དཔལ་བཟང་པོར་གསོལ། ཆོས་གྲྭ་ཆེན་པོ་རྩེས་ཐང་གི་གདན་སར་ཕེབས་ནས་རིག་པའི་དབང་ཕྱུག་ཆོས་ཀྱི་གྲགས་པའི་བསྟན་བཅོས་ཚད་མ་རྣམ་འགྲེལ་གསུངས་པས་ཤིན་ཏུ་ཕྲ་བ་རྟོག་གེའི་རིག་པ་ལ་མངོན་པར་ང་རྒྱལ་བའི་མཁས་རློམ་ས་སྲུང་རྣམས་ཀྱི་སྤོབས་པ་ཕྲོགས། དེ་ནས་ཕོ་བྲང་ཆེན་པོའི་སེངྒེའི་ཁྲིའི་དགའ་ཚལ་དུ་ཞབས་ཟུང་སཱ་ལ་ཆེན་པོའི་ལྗོན་པ་རྣམ་པར་བཀོད་པའི་རྫོགས་ལྡན་གསར་པའི་དྲི་བསུང་མ་ལ་ཡའི་རླུང་བཞོན་གྱིས་བོད་ཆེན་པོར་འཁོད་པའི་སྐྱེ་རྒུ་ཀུན་གྱི་དུཿ་ཁའི་ཚ་གདུང་གི་འཇིགས་པ་མིང་གི་ལྷག་མར་མཛད་ནས། ཕན་པ་དང་བདེ་བའི་ཆར་ཆེན་པོ་ཐ་གྲུ་ཀུན་ཏུ་ཕབ། བཀྲ་ཤིས་སྒོ་མང་གསུམ་གྱིས་ཐོག་དྲངས་པའི་ཐུགས་དང་སྐུའི་རྟེན། བདེ་བར་གཤེགས་པའི་བཀའ་དྲི་མ་མེད་པ་བོད་དུ་འགྱུར་བའི་གླེགས་བམ་མཐའ་དག་ས་ལེ་སྦྲམ་གྱི་སྙིང་པོ་ལས་གྲུབ་པ་ཚར་གསུམ་གྱིས་ཐོག་དྲངས་གསུང་རྟེན་མཐའ་ཡས་ཤིང་། དེ་དག་ཀྱང་རྒྱལ་མཁར་རྩེའི་སྡེ་དགོན་དུ་བཀའ་འགྱུར་ཤིན་ཏུ་མང་བ་ཆར་རྩིས་ནས་བྲིས་པ་སྣང་བ་ལྟ་བུ་མ་ཡིན་པར་རྒྱུ་ཕུན་སུམ་ཚོགས་པའི་སྟེང་དུ། བོད་ཀྱི་ཡི་གེ་མཐའ་དག་