[A:༡༤༧]བཀའ་དྲིན་ལས་མངའ་ཐང་ཆེ་བར་ཡོད་ཀྱང་། ཅུང་ཟད་བྱེད་མ་མཁས་པས་གོང་མའི་ཐུགས་ལ་ཕོག་སྟེ། ཉང་སྟོད་དུ་དཔུང་གི་འཇུག་སྒོ་ལན་གཉིས་ཙམ་མཛད་པས། ཡར་ཀླུངས་པ་རྣམས་དགྲ་ཉང་སྟོད་ཤར་ཁ་བ་ཟེར་བའི་སྐབས་བྱུང་ཞིང་། འོན་ཀྱང་དྲན་འཛིན་ཙམ་ལས་རྒྱལ་མཁར་རྩེ་རྩིས་ལེན་པ་སོགས་མ་མཛད། དེ་ཙམ་མ་གཏོགས་དབུས་གཙང་མཐའ་དག་བདེ་འཇགས་ལས། དཔུང་གི་འཇུག་སྒོ་སོགས་སྡིག་པའི་ལས་ཀྱི་སྦྱོར་བ་ལ་མི་རེ་བར་ཆོས་ལྡན་རྒྱལ་པོའི་ཁྲིམས་ཉིན་བྱེད་དབང་པོ་ཤར་བ་ན། མི་བསྲུན་པའི་སྐྱེ་བོ་ཞེ་སྡང་གི་འདབ་མ་རྣམ་པར་རྒྱས་པའི་ཀུ་མུ་ཏའི་ཚལ་མཐའ་དག་རང་ཤུགས་ཀྱིས་ཟུམ་པར་གྱུར་ཏོ། །
གོང་མ་འདིའི་དུས་དཔའ་འཛངས་རྟུལ་ཕོད་པའི་རྒྱལ་པོའི་བྱ་བ་ལ་མཁས་པའི་བློན་པོ་རིན་སྤུངས་ནམ་མཁའ་རྒྱལ་མཚན་རིན་སྤུངས་ཀྱི་རྫོང་དཔོན་དང་། ས་སྐྱའི་ལྷ་ཁང་ཆེན་མོའི་དཔོན་ཆེན་གྱི་ཁྲིར་བསྐོས། འཕྱོང་རྒྱས་པ་ཧོར་དཔལ་འབྱོར་བཟང་པོར་བསམ་འགྲུབ་རྩེའི་རྫོང་དཔོན་དང་དམག་དཔོན་གྱི་ལས་ཀ་གནང་། གཞན་ཡང་སྣེའུ་པ་ནམ་མཁའ་བཟང་པོ། བྲག་དཀར་བ་རིན་ཅེན་དཔལ་རྣམས་གྲགས་ཆེ། རིགས་རུས་ཡོན་ཏན་མངའ་ཐང་སོགས་ལུགས་གཉིས་ཀྱི་གོ་རིམ་དང་མཐུན་པའི་དྲུང་འཁོར་ཤིན་ཏུ་མང་ཞིང་། དེ་དག་ཀྱང་ཆེན་པོའི་ལས་ཚན་གྱི་སྒོ་དང་བསྟུན་པའི་རྒྱན་གོས་ཀྱི་རིམ་པ་དང་། ཁྱད་པར་གནམ་ལོ་གསར་དུ་ཚེས་པའི་དགའ་སྟོན་དུས་རིན་ཅེན་རྒྱན་ཆར་གྲགས་པའི་བཀོད་པས་ཁྱད་པར་དུ་འཕགས་པའི་རྒྱན་སྤྲོད་དང་། རྒྱུན་མར་ཡང་རིན་པོ་ཆེའི་ཕྲ་ཚོམས་ཀྱིས་རྣམ་པར་མཛེས་པའི་ཀཱརྞི་ཀ་རྣ་བའི་རྒྱན་དུ་སྤུད་པ་སོགས་མཛད་ལ། མདོར་ན་ལུགས་གཉིས་ཀྱི་མཛད་པ་བཟང་པོ་གཞན་དག་ལྟ་ཅི་སྨོས། གནས་སྐབས་ཀྱི་སྤྱོད་ལམ་ཡང་ཡ་རབས་བཟང་པོ་ཆེ་བཙུན་གྱི་ངང་ཚུལ་ལས། ལུང་མ་བསྟན་གྱི་ཞྭ་གོས་གྱོན་པ། སྒྲིགས་ཀུན་སྤྱོད་ཀྱི་སྲང་ལ་བཅུར་བ་མེད་