[A:༡༥༤]ས་གནང་། ཞབས་དྲུང་གོང་མ་ཆེན་པོ་དཔལ་ངག་གི་དབང་ཕྱུག་བཀྲ་ཤིས་གྲགས་པ་རྒྱལ་མཚན་ཕྱོགས་ཐམས་ཅད་ལས་རྣམ་པར་རྒྱལ་བ་ཀྭ་དིན་གུ་ཤྲི་ཧོ་ཝང་གི་མཚན་གྱི་ཟློས་གར་སྲིད་པ་གསུམ་གྱི་མེ་ལོང་གི་ངོས་སུ་གསལ་བར་ཤར་རོ། ། མི་རིང་བར་རིན་སྤུངས་པས་མེ་ཏོག་མདའ་ཅན་གྱི་ལས་དང་ཚངས་པ་མཚུངས་པར་སྤྱོད་པའི་སྡིག་སེམས་ཀྱིས་སྡེ་གཟར་བསླངས་པས། ལྷ་མ་ཡིན་ལྷའི་མངའ་ཐང་ལ་ཕྲག་དོག་གི་བསམ་པས་གཡུལ་བཀྱེ་བ་ན་ལེགས་བྲིས་པ་རྣམས་ཀྱི་བསོད་ནམས་ཀྱི་མཐུས་ལྷ་མིན་མཐའ་དག་མིང་གི་ལྷག་མར་འགྱུར་བ་དེ་བཞིན་དུ་སྡེ་སྲིད་མཚན་ཇུས་རྒྱལ། འོན་ཀྱང་ཞྭ་དམར་ཆོས་གྲགས་པས་བར་མཛད་ནས་ལོ་གསུམ་གྱི་ཆིངས་བསྡམས་ནའང་། རིན་སྤུངས་པས་སླར་སྡེ་གཟར་བསླངས་ཏེ་རྒྱལ་མཁར་རྩེར་བཏེག་སྐབས། འཕྱོང་རྒྱས་པ་རིན་ཅེན་རྒྱལ་མཆོག་གིས་གཙོས་གོང་མའི་དཔུང་ཆེན་རྣམས་ཉང་སྟོད་བར་དུ་བྱོན། དགའ་ལྡན་པ་དམག་དཔོན་བསོད་ནམས་རྒྱལ་པོས་སྐྱིད་འཕན་གྱི་དཔུང་རྣམས་ཁྲིད་དེ་ཤངས་ཀྱི་བར་དུ་བཏེགས་པས་རི་ལ་སྤྱི་བོས་བརྡུང་བའི་རྣམ་ཐར་འཛིན་པ་ཆེར་རློམ་གྱི་དྲེགས་ལྡན་གཞིས་ཀ་རིན་སྤུངས་པ་འབངས་གྱེན་ལོག་གི་རྒྱུ་མི་ཟད་པ་བསགས་པའི་འབྲས་བུ་དུས་གཅིག་ཏུ་སྨིན་པས་ཅི་བྱ་གཏོལ་མེད་དུ་གྱུར་ནའང་། རྒྱལ་རྩེ་དང་པ་སྣམས་པའི་ས་ཆ་བཤོར་བ་རྣམས་ཕྱིར་སྤྲོད་པ་དང་། གོང་སར་དགོངས་བསངས། རྫོང་དཔོན་གྱི་ལས་ཀ་ཞུ་བ། ཕྱིན་ཆད་མ་རུངས་པའི་སེམས་འདོར་བ་སོགས་ཀྱི་དན་ཁ་ལས་མཐའ་མེད་དུ་གཏོང་བ་མ་མཛད། དེ་ལྟ་ནའང་དུས་ཀྱི་བསྐལ་པས་འགྲོ་བའི་བསོད་ནམས་མཐུ་དམན་ཞིང་། ནག་པོའི་ཕྱོགས་ཀྱིས་ཡིད་བསྒྱུར་བས་བདུད་ཀྱི་ལས་འགྲུབ་པའི་འབྲས་བུའི་ཤུགས་གང་གིས་ཀྱང་དགག་དཀའ་བར་བརྟེན། རིན་སྤུངས་པ་དཔོན་བློན་གྱིས་སྡེ་གཟར་ཚན་ཆེ་བར་བསླངས་ཀྱང་། སྡེ་སྲིད་ཀྱི་མཚན་ཇུས་ལ་སྐྱོན་མ་བྱུང་། གོང་མ་འདི་ཉིད་ཀྱིས་བདེ་བར་གཤེགས་པའི་གསུང་གི་སྙིང་པོ་གསེར་ཞུན་མའི་