[A:༡༥༥]ཁུ་བས་བྲིས་པའི་བཀའ་འགྱུར་དང་། སྟོང་འཁུན་མཛངས་མའི་སོར་མོའི་འདུ་བྱེད་ལས་བསྐྲུན་པའི་གན་གོས་ཁ་དོག་སྣ་ཚོགས་ལས་གྲུབ་པའི་སྐུ་བརྙན་བཞེང་བ་ཕྱོགས་ལྷུང་གི་བསམ་པས་རིས་སུ་མི་གཅོག་པར། སྟོན་པ་བུ་རམ་ཤིང་པའི་རྗེས་སུ་ཞུགས་པའི་གྲུབ་པའི་མཐའ་ཐམས་ཅད་ལ་བསྙེན་བཀུར་དང་མགོ་འདྲེན། ཇོ་ཤཱཀ་རྣམ་གཉིས་དང་བྱང་ཆུབ་ཆེན་པོས་ཐོག་དྲངས་པའི་གངས་ཁྲོད་ཀྱི་སྐུ་གསུང་ཐུགས་རྟེན་ཁྱད་འཕགས་རྣམས་ཀུན་ཏུ་བཟང་པོའི་མཆོད་པའི་སྤྲིན་མངོན་པར་སྤྲོ་བ་དང་། རྗེ་བཙུན་ཕྱག་ན་པདྨ་དབསོད་ནམས་རྒྱ་མཚོ་དང་། དཔལ་འབྲུག་པའི་རིང་ལུགས་པ་པདྨ་དཀར་པོ་རྣམས་ཏི་ཤྲིར་བསྟེན། མདོར་ན་འཇིག་རྟེན་དང་འཇིག་རྟེན་ལས་འདས་པའི་དབང་ཕྱུག་མཐའ་དག་འབད་མེད་དུ་འགྲུབ་པའི་རྒྱུ་དགེ་བ་བཅུ་ལ་རྫོགས་པར་ལོངས་སྤྱོད་པ་དང་ལྡན་པའི་མེ་ཏོག་གཞོན་ནུ་གསར་དུ་དགོད་པའི་འཁྲི་ཤིང་ནམ་མཁའི་མཐའ་ཀླས་པར་འཁྱུད་པའི་ཁོར་ཡུག་དང་པོ་བདེ་བར་གཤེགས་པའི་སྙིང་པོ་མཆོག་གི་གོ་འཕང་སྲིད་པའི་རྩེ་མོར་བསྙེག་པའི་ཐེམ་སྐས་སུ་འཛུགས་པར་མཛད།
འདི་ཉིད་ཀྱི་དུས་རིན་སྤུངས་པ་དང་དཔོན་བློན་ནང་མཚམས་སུ་སེལ་ཆེ་བར་བྱུང་ཡང་། ཕྱི་རྒྱའི་བློན་ཆེན་གྱི་གྲལ་དུ་རིན་སྤུངས་ངག་དབང་རྣམ་རྒྱལ། སྲས་དོན་གྲུབ་ཚེ་བརྟན་རྡོ་རྗེ་རྣམ་གཉིས། འཕྱོང་རྒྱས་པ་ཧོར་རིན་ཅེན་རྒྱལ་མཆོག་སྐུ་མཆེད། སྲས་ཧོར་བསོད་ནམས་མགོན་པོ་མཆེད་གསུམ། དེའི་སྲས་ཧོར་བསོད་ནམས་དར་རྒྱས་རྣམས་རིམ་པ་བཞིན་དང་། བྲག་དཀར་འཇམ་དཔལ་ཚེ་རིང་རྒྱལ་པོ། ཡར་རྒྱབ་རིན་ཅེན་བཀྲ་ཤིས། དགའ་ལྡན་པ་བསོད་ནམས་རྒྱལ་པོ། བྱ་ནོར་བུ་བཀྲ་ཤིས་སོགས་བློན་པོ་དང་། དྲུང་འཁོར་འགངས་ཆེ་བ་ཤིན་ཏུ་མང་། གོང་མ་འདི་ཉིད་ལ་རིན་སྤུངས་ཀྱི་སྲས་མོ་ཞིག་ཁབ་ཏུ་བཞེས་པར་སྲས་གོང་མ་འགྲོ་བའི་མགོན་པོ་དང་། སྤྱན་སྔ་གྲགས་འབྱུང་བ་གཉིས་ལས། གོང་མ་འགྲོ་བའི་མགོན་པོ་གོང་དཀར་དུ་ཕེབས། དཔོན་ས་