[A:༡༥༧]པ་གོང་དཀར་དུ་བཞུགས་པ་ལ་ཡང་བསྐོར་རྒྱག་ཆ་གྲུལ་ཆེ་བ་བྱུང་སྐབས་གོང་དཀར་འདི་དབུས་གཙང་གཉིས་ཀྱིས་མདུད་འཛོམ་པའི་ལྟེ་བ་ལྟ་བུར་འདུག་པས་རང་རེའི་མི་ངོ་ཞིག་གིས་མ་བཟུང་ན་བོད་ཀྱི་བདེ་སྐྱིད་ལ་གནོད་པས་རྫོང་གཏོད་མི་དགོས་ཚུལ་གྱི་གོང་མའི་བཀའ་ཤོག་གོང་དཀར་དུ་གནང་བ་བསྐོར་མི་རྣམས་ཀྱི་ལག་ཏུ་བརྒྱབ་པས་དམག་རྣམས་གྱེས་ཏེ་བདེ་འཇགས་ཆེ་བ་བྱུང་།
ཞབས་དྲུང་ངག་དབང་གྲགས་པ་འདི་ཉིད་ཀྱིས་ལུགས་ཟུང་གི་མཛད་པ་མཐའ་ཡས་ཤིང་། ལྷག་པར་དགེ་འབྲུག་གཉིས་ལ་ཐུགས་མོས་ཆེ་བས་དམ་པའི་ཆོས་ཀྱི་གསན་པ་མང་དུ་མཛད། སྒེར་དུ་ཐམས་ཅད་མཁྱེན་པ་བསོད་ནམས་རྒྱ་མཚོ་དང་མཆོད་ཡོན་ཉི་ཟླ་ཟུང་གཅིག་ལྟ་བུར་ཐུགས་སྣང་དག་པ་བྱུང་བས་གོང་དཀར་དུ་འཇམ་དབྱངས་གོང་མའི་ཕོ་བྲང་ནས་རྟེན་འབུལ་གྱི་རྒྱུན་འཛུགས་པ་གནང་། གོང་མ་ཆེན་པོའི་སྲས་ཟུར་པ་སོགས་ཀྱིས་སྣེའུ་གདོང་རྩེའི་ཁྲིར་བཞུགས་ཤིང་། བདུད་མི་སྤུན་དགུས་དབུས་གཙང་ལན་མང་དུ་དཀྲུགས་པའི་སྲི་ངན་ལངས་ཏེ། བྱི་གླང་སྡེ་གཟར་གྱི་སྐབས་འཕོ་འགྱུར་ཤིན་ཏུ་ཆེ་བ་བྱུང་། ཞབས་དྲུང་ངག་དབང་གྲགས་པ་ལ་སྲས་བཀའ་བརྒྱུད་རྣམ་པར་རྒྱལ་བ་དང་། རྣམ་རྒྱལ་གྲགས་པ་གཉིས་འཁྲུངས་པར་གཅུང་ཡར་རྒྱབ་ནས་བདག་མོ་བྱོན་སྐབས་རིགས་འཛིན་ཆེན་པོའི་རྒྱལ་སྲས་པདྨ་ཆོས་རྒྱལ་དང་། ལྷ་རྩེ་བ་གཉིས་ཀྱིས་སྲུང་འཁོར་མཛད་དུས། རྒྱལ་སྲས་པས་ཐུན་བྲབ་སོགས་ཚམ་རྔམ་ཧ་ཅང་ཆེ་བས་བདག་མོ་འཛངས་ཏེ་འབྱོན་མ་ནུས་པར་བགེགས་སྐྲོད་ཀྱི་མཚམས་ཅུང་ཟད་བཞག་པས་རྟེན་འབྲེལ་འཕྱུགས་ནས་མ་འགྱངས་པར་ཞབས་དྲུང་རྣམ་རྒྱལ་གྲགས་པ་སྐུ་གཤེགས། གཅེན་བཀའ་བརྒྱུད་རྣམ་པར་རྒྱལ་བ་ལུགས་ཟུང་གི་མཁྱེན་སྒོ་ཡངས་ཤིང་ཁྱད་པར་ཕྱག་རྒྱ་ཆེན་པོ་སོགས་ངེས་དོན་གྱི་སྐོར་ལ་ཐུགས་གཞོལ། འདི་ཉིད་ཀྱི་སྲས་མི་ཕམ་བསོད་ནམས་དབང་ཕྱུག་གྲགས་པ་རྣམ་རྒྱལ་དཔལ་བཟང་ད་ལྟ་ཕོ་བྲང་སྣེའུ་གདོང་རྩེར་བཞུགས་སྐབས་སོ༎