[A:༡༦༦]ནུས་མཐུའི་མངའ་བདག་ཆེན་པོ་ཞིག་བྱུང་བས། ཧོར་སེ་ཆེན་རྒྱལ་པོས་གསན་ནས་གསེར་ཡིག་པ་མངགས་ཏེ་སྤྱན་དྲངས་ཀྱང་། ཐབས་མཁས་ཀྱི་མཛད་པས་བཏུལ་ཏེ་མ་ཕེབས། དེའི་སྲས་ཧོར་བཀྲ་ཤིས་འབུམ་དང་མཁན་ཆེན་ཚུལ་དར་བ་གཉིས་ལས། མཁན་ཆེན་པ་དཔལ་ལྡན་རླངས་ཀྱི་གདུང་ལས། སྤྱན་སྔ་བཅུ་གཉིས་རིན་པོ་ཆེར་སོ་སོར་ཐར་པའི་སྡོམ་པ་མནོས། བཀའ་བརྒྱུད་རིན་པོ་ཆེའི་ཟབ་ཆོས་མང་དུ་གསན་ཞིང་། སྤྱན་སྔ་གྲགས་པ་ཤེས་རབ་དང་། ཏའི་སི་ཏུ་བྱང་ཆུབ་རྒྱལ་མཚན་གཉིས་ཀྱི་དབུ་སྐྲའི་ཕུད་བཞེས་ཏེ་བླ་མ་མཛད།
ཧོར་བཀྲ་ཤིས་འབུམ་ལ་སྲས་གཞོན་ནུ་བཟང་པོ་དང་བཀྲ་ཤིས་བསམ་གྲུབ། གཉིས་ཀས་གོང་མ་སི་ཏུའི་ཞབས་ལ་གཏུགས། ཁྱད་པར་གཅེན་གྱི་གསོལ་ཇ་བ་ནས་བཟུང་བཀའ་བློན་གྱི་བར་ལས་ཚན་རིམ་པར་མཛད། དཔོན་ཆེན་རྒྱལ་བཟང་པས་སི་ཏུ་བཙོན་དུ་བཟུང་བའི་སྐབས། དམག་གིས་བསྡིགས་པའི་བསྐོར་གཡང་མང་དུ་བྱས་ཀྱང་སྣེའུ་གདོང་རྩེར་འཁྲ་ཕུར་བཟུང་ཞིང་། དཔོན་ཆེན་དབང་བརྩོན་གྱིས་ཁྲི་བསྐོར་བཅུ་གསུམ་གྱི་དམག་ཡར་ཀླུངས་སུ་བཏེག་པ་དུས་ཀྱི་མེ་ལྕེའི་འཕྲེང་བ་ལ་ཕྱེ་མ་ལེབ་མཆོངས་པའི་ངང་ཚུལ་བཞིན་བཅོམ་པས། སྟོབས་འབྱོར་གྱི་དྲེགས་པས་མྱོས་པའི་ས་སྐྱའི་དཔོན་ཆེན་ཀྱང་སྤ་བཀོང་བར་མཛད་པ་སོགས་ཀྱིས་སྡེ་སྲིད་ཕག་མོ་གྲུ་པའི་བསྟན་ཇུས་ཚུགས་པའི་རྩ་བ་ལྟ་བུར་བྱུང་བས། སི་ཏུས། གཞོན་ནུས་སྙིང་བགྱིས། གཞན་རྣམས་ཡན་ལག་གི་ཚུལ་བགྱིས་ཞེས་དང་། གཞན་ཡང་ཡ་གི་གཙང་ས་སྐྱ་ནས་སྨད་འཇང་ཞབས་ལྷོ་མོན་དང་བཅས་པ་མངའ་འོག་ཏུ་འདུ་བ་གཞོན་ནུ་བཟང་པོའི་དྲིན་ཡིན་གསུངས། གཅུང་བཀྲས་བསམ་པའི་སྲས་གཞོན་ནུ་རྒྱལ་མཚན། ཀུན་དགའ་དཔལ་བཟང་། ནམ་མཁའ་རིན་ཅེན། དབང་ཕྱུག་རིན་ཅེན་དང་བཞི་བྱུང་བ་རྣམས་ཀྱིས་སྤྱན་སྔ་རིན་པོ་ཆེ་དང་གོང་མ་སི་ཏུའི་ཞབས་ལ་གཏུགས། རྒྱལ་སྲིད་སྐྱོང་བའི་བློན་པོའི་བྱ་བ་རྣམས་གོང་སའི་དགོངས་པ་དང་བསྟུན་པར་