[A:༡༦༧]མཛད་དོ༎
ཀུན་དགའ་དཔལ་བཟང་གི་སྲས་དཔལ་འབྱོར་བཟང་པོ། བསོད་ནམས་དཔལ་ལྡན། སངས་རྒྱས་སྐྱབས། དཀོན་ཅོག་རིན་ཅེན་བཞི་འཁྲུངས། དཔལ་འབྱོར་བཟང་པོས་ཚེས་བཞི་གསར་མ་བའི་ཞབས་ལ་གཏུགས། ཉང་སྨད་བསམ་འགྲུབ་རྩེའི་རྫོང་དཔོན་དང་། ཕྱིས་སུ་དམག་དཔོན་ལ་བསྐོས་པས་དགྲ་ཤ་དྲོད་མ་ཡལ་བར་བླངས་པས་སྲིན་པོ་ཡང་བྱིན་ཤ་འདར་ཞེས་དཔའ་རྟགས་བྱུང་། ཐམས་ཅད་མཁྱེན་པ་དགེ་འདུན་གྲུབ་དང་མཆོད་ཡོན་དུ་འབྲེལ་བས། རྒྱལ་བ་གཉིས་པ་བཙོང་ཁ་པའི་རིང་ལུགས་ལ་མོས་པ་ཐོབ། བསམ་རྩེ་ན་ཀུན་མཁྱེན་བུའི་ཕྱག་བྲིས་དང་ཕྱག་རྟགས་འབྱར་བའི་བཀའ་འགྱུར་བཞུགས་པ་ཕྱིང་བར་སྟག་རྩེར་གདན་དྲངས། གཅུང་གསུམ་གྱི་ས་སྐྱོང་གྲགས་པ་རྒྱལ་མཚན་གྱི་ཞབས་ལ་གཏུགས། ཁྱད་པར་ནང་སོ་དཀོན་ཅོག་རིན་ཅེན་གོང་མའི་ལུགས་གཉིས་ཀྱི་མཛད་པ་མཐའ་དག་སྤེལ་བའི་ནང་བློན་མཛད། བོད་ཀྱི་བློན་པོ་རིག་པ་ཅན་རྒྱུད་མར་འབྱུང་བའི་རྟེན་འབྲེལ་གྱི་རི་བོའི་འདབས་རོལ་ཏུ་ཕྱིང་བར་སྟག་རྩེའི་བཙན་རྫོངས་ལྷའི་གྲོང་ཁྱེར་མི་ཡུལ་དུ་འཕོས་པ་ལྟ་བུར་ཡིད་དུ་འོང་བ་བརྩིགས། དེའི་སྐབས་སྲས་ཉག་ཕྲ་བར་བྱུང་བས། གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་ནས་ཆོས་རྗེ་ཞྭ་ལུ་པ་ལེགས་པ་རྒྱལ་མཚན་གདན་དྲངས། གཤེད་དམར་གྱི་སྒོ་ནས་རིགས་བསྐྲུན་པའི་ཆོ་ག་མཛད་པས་ཧོར་རྡོ་རྗེ་ཚེ་བརྟན་འཁྲུངས། སྐབས་ཤིག་ལྷ་མོ་འོད་ཟེར་ཅན་མའི་ལས་ཚོགས་ལ་བརྟེན་ནས། རྒྱ་ཁབ་རྩེར་བརྒྱུས་དགྲ་ཕྱོགས་སུ་བསྟན་པས་དམག་དཔུང་ཆེན་པོར་མཐོང་བ་དང་། རྫོང་ལ་ཆུ་མེད་པར་དབྱངས་འཆར་གྱི་སྒོ་ནས་ལུ་མ་བཏོན་པ་སོགས་བཀའ་དྲིན་ཆེ་བས་དགའ་ལྡན་དོས་སྐྱེལ་དུ་གྲགས་པ་ཞལ་ངོ་རིམ་པར་མཛད།
ཧོར་རྡོ་རྗེ་ཚེ་བརྟན་དབང་གྲགས་པ་འབྱུང་གནས་སྐུ་མཆེད་ཀྱི་ཞབས་ལ་གཏུགས་ནས་བཀའ་ཁྲིམས་སྒྱུར་བའི་བློན་པོ་མཛད། ཕྱིང་བར་སྟག་རྩེའི་རི་