[A:༡༧༨]བའི་ལྗོངས་སུ་འགྱུར་རོ་ཅོག་བཞེང་བ་སོགས་སྐུ་ཚེའི་སྟོད་ལ་རྒྱལ་སྲིད་ཆོས་བཞིན་དུ་བསྐྱངས་ཤིང་། རྗེས་སུ་རིགས་ཀྱི་སྲས་ནར་སོན་པ་དང་། ཆོས་རྗེ་རྒྱལ་ཚབ་པའི་དྲུང་དུ་བསྟན་པའི་རྩ་བ་སོ་སོར་ཐར་པའི་སྡོམ་པ་མནོས། འོལ་ཁ་དགེ་སྦྱོང་ཆེན་པོར་སྐྱེ་བོ་རྣམས་གླེང་། དེ་རྗེས་ནོར་བཟང་པ་དང་། རྒྱ་མཚོ་བ་མཆེད་ཀྱིས་སྲིད་བསྐྱངས་ཤིང་སྡེ་པ་རྒྱ་མཚོ་བ་ལ་གོང་མ་ཆེན་པོས་དམག་དཔོན་གྱི་ལས་ཀ་གནང་བས། གཞན་སྡེ་འཇོམས་པ་ལ་སྙིང་སྟོབས་ཀྱི་རྩལ་དང་ལྡན་སྐད།
དེ་ནས་མཁན་ཆེན་པས་མཆོད་ཁང་དང་། རྗེ་བཙུན་མི་ཕམ་མགོན་པོའི་སྐུའི་སྣང་བརྙན་བཞེང་བ་སོགས་གོང་མའི་རྒྱུན་བཟང་པོ་བཟུང་། དེ་རྗེས་དོན་ཡོད་རྣམ་རྒྱལ་རྡོ་རྗེས། མཁས་ཤིང་གྲུབ་པའི་དབང་ཕྱུག་རྗེ་བཙུན་ནོར་བཟང་རྒྱ་མཚོ་ཞེས་དང་པོའི་སངས་རྒྱས་དཔལ་དུས་ཀྱི་འཁོར་ལོའི་གཞུང་ལུགས་སྔོན་ཆད་གངས་ཅན་པ་རྣམས་ཀྱིས་མ་རྟོགས་པ་དང་ལོག་པར་རྟོགས་པའི་ཐེ་ཚོམ་གྱི་དྲ་བ་མཐའ་དག་དྲུང་ནས་འབྱིན་པའི་ཤིང་རྟེ་ཆེན་པོ་པ་དང་། ཐམས་ཅད་མཁྱེན་པ་དགེ་འདུན་རྒྱ་མཚོ་རྣམས་ལ་གུས་མཆོད་ལྷུར་ལེན་ཞིང་། ཁྱད་པར་གསང་བ་མཁའ་འགྲོའི་སྦས་པའི་བསྟི་གནས་ཆོས་འཁོར་རྒྱལ་གྱི་འདུས་སྡེ་རྟེན་དང་བརྟེན་པར་བཅས་པ་ལ་འཚོ་བའི་ཡོ་བྱད་བཟང་པོ་གོང་འཕེལ་དུ་སྦྱར་བ་སོགས་དགེ་བའི་ལས་ཀྱི་ཤུགས་ཟད་པ་མེད་པའི་རལ་གྲིས་མུ་མཐའ་མེད་པའི་འཁོར་བ་ནགས་ཀླུང་སྟུག་པོའི་མཐའ་དབྲལ་ཏེ། སྲས་ཕུན་ཚོགས་རབ་བརྟན་གཤེགས་པར་བརྟེན། ཞལ་ངོའི་བརྒྱུད་རིང་བར་མ་བྱུང་ཡང་། ཕྱིས་སུ་འོད་གསལ་ལྷ་ལས་བབས་པའི་ས་སྐྱོང་བ་དང་ཁྱོན་གཅིག་པར་གྱུར་ཏོ༎ ༎
༈ ཡར་རྒྱབ་པ་ནི། ཆོས་ཀྱི་རྒྱལ་པོ་སྲོང་བཙན་སྒམ་པོའི་བློན་པོ་ཐོན་མི་སམྦྷོ་ཊ་ཞེས་བྱ་བ་འཇམ་དབྱངས་ཀྱི་རྣམ་པར་སྤྲུལ་པ། སྔར་བོད་དུ་ཡི་གེའི་སྲོལ་མེད་པ་ལ། རྒྱ་ཡིག་ལྔ་བཅུ་ཐམ་པ་བོད་ཡིག་སུམ་ཅུར་གཏན་ལ་འབེབས་པའི་