[A:༡༧༩]ཤིང་རྟ་ཆེན་པོ་དེ་ཉིད་ཀྱི་གདུང་བརྒྱུད་ཡིན་ལ། ཁ་ཅིག་བྷོ་ཊ་ཞེས་སྨྲ་བ་ནི་མི་རིགས་པར་སཾ་བྷ་དྲར་འདོད་པ་མཆིས་ནའང་སམྦྷོ་ཊ་ཞེས་གངས་རིས་བསྐོར་བའི་ལྗོངས་འདིར་ལེགས་པར་སྦྱར་བ་ལྷའི་སྐད་སྨྲ་བ་ལ་འགྲན་པའི་ཟླ་ཐམས་ཅད་དང་བྲལ་བ་ཞུ་ཆེན་གྱི་ལོ་ཙཱ་བ་ཆེན་པོ་ཞ་ལུ་བ་ཆོས་སྐྱོང་བཟང་པོས་མཛད་པའི་བརྡ་སྤྲོད་པའི་བསྟན་བཅོས་ཟ་མ་ཏོག་ཏུ། གངས་ཅན་ཁྲོད་པའི་བླ་མ་མཆོག་། སམྦྷོ་ཊ་ཞེས་རབ་གྲགས་པའི༎ ་ཞེས་གསུངས་པས་སོ། ། ཆོས་བློན་ཆེན་པོ་འདི་ཉིད་ཀྱི་སྲས་མ་ཧཱ་ས་ཏྭ། དེའི་སྲས་ཡེ་ནག་དེའི་སྲས་ཉི་མ་ཀློང་གསལ། དེའི་སྲས་བེར་ནག་ཅན། དེའི་སྲས་མོན་མོ། དེའི་སྲས་གཙོ་བོ་ལྷ་སྲས། འདི་རྣམས་དགུང་ལོ་བརྒྱ་ལྷག་ཙམ་བཞུགས་པ་ཤ་སྟག་བྱུང་། དེའི་སྲས་བསོད་ནམས་རྒྱལ་པོ། དེའི་སྲས་རྒྱལ་པོ་དགའ། དེའི་སྲས་རྟ་མགྲིན་རྒྱལ་མཚན། དེའི་སྲས་རྡོ་རྗེ་བཀྲ་ཤིས། འདིས་དཔལ་ལྡན་ས་སྐྱར་ཏི་ཤྲི་ཀུན་བློའི་ཞབས་ལ་གཏུགས། དེ་ཉིད་ཀྱི་ཧོར་རྒྱལ་པོའི་དྲུང་དུ་བརྫངས་པས། དུ་དབེན་ཤྲིའི་བྱ་ལས་ཆེན་པོ་གནང་།
དེའི་སྲས་དཔོན་བཞི་འཛོམ། གོང་མ་གྲགས་པ་རྒྱལ་མཚན་གྱིས་གཞིས་ཀ་གོང་དཀར་གྱི་རྫོང་དཔོན་ལ་བསྐོས། དེའི་སྲས་རྒྱལ་བ་ཤེས་རབ། དེའི་སྲས་དཔོན་ཆེན་གྲལ་ལྔ། འདི་ཉིད་ཀྱིས་སྐུ་ཚེའི་སྟོད་ལ་གོང་མ་གྲགས་པ་འབྱུང་གནས་ཀྱིས་ཡར་རྒྱབ་དཔོན་ཆེན་དང་གོང་དཀར་རྫོང་དཔོན་གྱི་ལས་ཀ་གནང་། འོན་ཀྱང་སྤྲུལ་པའི་གང་ཟག་ཁྱད་པར་དུ་འཕགས་པ་ཡིན་པས། སྐུ་ཚེའི་སྨད་ལ་རབ་ཏུ་བྱུང་སྟེ་གསང་བ་སྔགས་ཀྱི་ཆོས་སྡེ་གོང་དཀར་རྡོ་རྗེ་གདན་དུ་གྲགས་པའི་ངོ་མཚར་ཅན་དེ་བཏབ། འདི་ཉིད་ཀྱི་དབོན་སྲས་ནས་བཟུང་སྟེ། སྡེ་པ་རྣམ་རྒྱལ་བ་སྐུ་མཆེད་ཀྱི་བར་དུ་མངའ་ཐང་ཡར་རྒྱས་སུ་གནས་སོ༎ ༎
༈ བྱ་པ་ཁྲི་དཔོན་ནི། ཡུལ་ཡར་ཀླུངས་ཀྱི་སྨད། མ་ཡུལ་ལྗོངས་ཀྱི་འདབས་སུ་བྱའི་རྒྱལ་པོ་གཤོག་བཟང་དང་འདབ་བཟང་གི་རིགས་ལས་མཆེད་པ་