[A:༡༨༡]བཟང་གསུམ་ལས། དང་པོའི་སྲས་རིན་ཅེན་དཔལ། དབང་ཕྱུག་རིན་ཅེན། རིན་ཅེན་བཟང་པོ། དྭགས་པོ་བ་བཞི་བྱུང་། དྭགས་གཉལ་ལོ་རོ་རྣམས་སུ་གཞིས་ཀ་མང་དུ་བརྩིགས། བྱ་རིན་ཅེན་གྱིས་ཨེ་གཉལ་བྱར་དྭགས་ལོ་རོ་རྣམས་ཀྱི་སྒོ་སྡུད་མཛད་ནས་ཧོར་དམག་བཟློག་པས་ཀུན་གྱིས་དཔོན་དུ་བཀུར།
འདིའི་སྲས་ཀུན་དགའ་རིན་ཅེན་གྱིས་ས་སྐྱའི་དཔོན་ཆེན་ཀུན་དགའ་བཟང་པོ་ལ་གཏུགས། བྱ་ཆོས་རྒྱལ་དཔལ་བཟང་པོས་འགྲོ་མགོན་འཕགས་པའི་དྲུང་དུ་བྱོན། ཤར་པ་ཀུན་བསོད་ལ་སློབ་དཔོན་བཅོལ་ནས་རྒྱུད་གསུམ་མན་ངག་དང་བཅས་པ་སྦྱངས་པ་མཛད། ཨ་མི་བྱ་ནག་གི་དུས་ལ་ཡང་རྩེར་མགོན་ཁང་སོགས་ཡོད་པའི་སྟེང་དུ། སླར་གཙུག་ལག་ཁང་དུ་གྲགས་པའི་མཁར་ལས་རྒྱ་བསྐྱེད། རྒྱ་ཧོར་གྱི་ནོར་སྣ་མང་པོ་བསྡུས་ནས་མཛོད་ནག་ཏུ་རྒྱས་བཏབ། རྒྱལ་བའི་བཀའ་འགྱུར་གསེར་ལས་གྲུབ་པ་བཞེངས། ཆོས་སྲིད་ཀྱིས་མཐོ་བའི་འགོ་ཚུགས། འདིའི་སྲས་ཀུན་དགའ་རྒྱལ་མཚན། མཁན་ཆེན་སྤྱིལ་པུ་བ། མངའ་བདག་ཆོས་སེང་འོད། བྱ་ཐུབ་པ་དཔལ་རྣམས་ལས། དང་པོས་དཔོན་ཆེན་འོད་ཟེར་སེང་གེ་ལ་འདམ་དུ་རྫོངས་ཞུ་བར་བྱོན། རྟེའུ་རའི་གྱ་གཉེར་ཀྱང་འདིའི་རིང་ལ་བྱུང་། མངའ་བདག་ཆོས་སེང་འོད་འབྲི་གུང་གི་སྐུ་ཚ་ཡིན་པར་བརྟེན། འབྲི་གུང་ནས་བྱར་དྭགས་ཀྱི་དཔོན་དུ་བསྐོས།
དེའི་སྲས་མཁན་ཆེན་ཚུལ་ཁྲིམས་བཟང་པོས་ཟངས་མོ་ཆེའི་མཁན་པོ་མཛད། སླར་ཡང་རྩེར་ཁྲི་དཔོན་གྱི་གོ་སར་བྱོན། དེའི་སྲས་དཀོན་ཅོག་བཟང་པོ། དེའི་སྲས་བཀྲ་ཤིས་དཔལ་བཟང་གིས་རྩེས་ཐང་དུ་སློབ་གཉེར་མཛད། བཤད་སྟོན་བཟང་པོ་བཏང་། གོང་མ་སྡེ་སྲིད་གྲགས་པ་རྒྱལ་མཚན་གྱིས་བྱ་པའི་ཁྲི་དཔོན་ལ་བསྐོས། དེའི་སྲས་རྒྱལ་བ་བཀྲ་ཤིས། ཤཱཀྱ་དཔལ་མགོན། ཐུབ་པ་རྒྱལ་མཚན་རྣམས་ལས། དང་པོས་སྣེའུ་གདོང་རྩེར་བྱོན། གོང་མ་སྡེ་སྲིད་ཀྱི་དྲུང་འཁོར་མཛད། བྱ་པ་ཁྲི་དཔོན་གྱི་གོ་སར་བསྐོས། སྲས་བྱ་བཀྲ་