[A:༡༨༧]འདུན་རྒྱ་མཚོ་དང་མཆོད་ཡོན་དུ་འབྲེལ། རྒྱ་རི་ལྕོག་མཁར་དུ་ལོ་གར་གཏོར་ཆེན་གྱི་ཕྱག་སྲོལ་བཙུགས། ལྷ་དགྲ་ལས་པས་ཨེ་ཆེན་རི་སྒོ་ཕྱོགས་སུ་ཕེབས་པས། ཡུལ་དུ་བཀྲ་ཤིས་པའི་དགེ་མཚན་མང་དུ་བྱུང་བས། ཡུལ་མི་རྣམས་ཀྱིས་ནས་ཕུད་ཁལ་རེ་ཕུལ། བླའི་དཔོན་དུ་གྱུར་ཏེ། རི་སྒེ་བཀྲ་ཤིས་ཆོས་རྫོང་དུ་ཕོ་བྲང་གི་ལྟེ་བ་མཛད། དེ་ནས་ལྷ་འཇིག་རྟེན་དབང་ཕྱུག་ཁྲི་ཐོག་ཏུ་ཕེབས་རྗེས། ལྷ་བྱམས་པ་རབ་བརྟན་དང་། ལྷ་ཡུལ་འཁོར་དབང་ཕྱུག་སྐུ་མཆེད་གཉིས་བྱུང་། འདིའི་དུས་སུ་སྤྲུལ་སྐུ་བདེ་ཆེན་གླིང་པས། ཨེ་ཡི་ནང་དུ་ཁྲག་མཚོ་ལན་གསུམ་ཁོལ། ། རྒྱལ་པོ་བྱམས་པའི་མིང་ཅན་བྱ་བ་འབྱུང་། ། རྒྱལ་པོ་དེ་ཡི་བསྟན་པ་རྒྱས་པ་ལ་ཞེས་སོགས་ཀྱི་དོན་དང་མཐུན་པར་མངའ་ཐང་གོང་དུ་འཕེལ། ཁྱད་པར་ལྷ་ཡུལ་འཁོར་བས་ལང་ཀའི་གྲོང་ཁྱེར་ས་ལ་འཕོས་པ་ལྟ་བུའི་བཙན་རྫོང་འོལ་ཁ་སྟག་རྩེ་མངའ་འབངས་དང་བཅས་པ་རང་དབང་དུ་མཛད།
དེ་ནས་ལྷ་བསོད་ནམས་རབ་བརྟན་སྐུ་མཆེད་གསུམ་ལས། བསོད་ནམས་རབ་བརྟན་ཁྲི་ཐོག་ཏུ་ཕེབས། ཆད་དཀར་རྫོང་གི་ཉེ་འདབས་སུ་དགེ་འདུན་གྱི་སྡེ་འཛུགས་པ་སོགས་རྒྱལ་སྲིད་ཆོས་བཞིན་དུ་བསྐྱངས། དེ་རྗེས། ལྷ་དགའ་ལྡན་དཔལ་འབར་གྱིས་ཁྲིར་ཕེབས་ནས་རྒྱལ་བའི་བསྟན་པ་སྤྱི་དང་། ཁྱད་པར་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་བསྟན་པ་ལ་སྲི་ཞུ་བླ་ལྷག་ཏུ་མཛད། རོག་པ་རྩར་མི་བསྲུན་པའི་སྐྱེ་བོ་རང་ཉམས་གྱི་བློའི་སྤྱོད་ཡུལ་ཅན་རྣམས་མིང་གི་ལྷག་མར་བཅོམ་པས་མགོ་ལག་ཁྲག་གི་རལ་པས་སྦགས་པ་བླངས་པ་སོགས་འཇིགས་པ་མེད་པའི་སྙིང་སྟོབས་ཀྱིས་རྣམ་པར་རྒྱལ་བའི་དབུ་རྨོག་བཙན་པོ་གྱོན། དེ་རྗེས་ཁྲི་ཐོག་ཏུ་བློ་བཟང་མཐུ་སྟོབས་ཆོས་རྒྱལ་བྱོན་ནས་སྙིང་རྗེ་ཆེན་པོའི་གཞན་དབང་གིས་སྡེ་འཁྲུག་སྙོལ་བ་གཙོ་བོར་མཛད། འོན་ཀྱང་ལས་ངན་གྱི་རྦ་ཀློང་དྲག་པོས་བདས་པའི་སྐྱེ་བོ་འཕར་འགྲོའི་རིགས་ཅན་ན་ཀྲའི་མགྲིན་པར་