[A:༡༩༢]དུ་གྱུར་ཏེ། ཁར་ཁ་ཨོ་རོད་ཕན་ཚུན་དུ་འགྲུལ་ཙམ་ཡང་བྱེད་མི་ནུས་པའི་སྐབས། བདག་གཞན་བརྗེ་བའི་སྙིང་སྟོབས་ཀྱི་གོ་ཆ་བཙན་པོ་གྱོན་ཏེ། ཁར་ཁའི་ཁྲོད་དུ་ཚམ་ཚོམ་མེད་པར་བྱོན་ནས། གཞུང་དཀའ་ཚེགས་ཆུང་ངུས་བཟླུམས་པར་མཛད་པ་དགེ་ལེགས་པའི་ཕ་རོལ་ཏུ་ཕྱིན་པ་ལྟ་བུའི་རྣམ་ཐར་རོ། ། སྟོང་འཁོར་ཆོས་རྗེ་དང་ཁར་ཁའི་རྒྱལ་བློན་རྣམས་ཡི་རངས་ཏེ། དའི་གུ་ཤྲི་ཞེས་ཆོ་ལོ་བྱིན། སླར་རང་ཡུལ་དུ་བྱོན། རྗེ་བསོད་ནམས་རྒྱ་མཚོ་ལ་ཨོ་རོད་ཅིག་གིས་མདོ་སྡེ་གསེར་འོད་དམ་པ་ལ་ཕྱག་ནས་ཞུས་པའི་ཚེ། གསུང་རབ་ཀྱི་མིང་དྲི་བ་གནང་བར། ཨལ་ཏན་གེ་རིལ་ཟེར་ཞུས་པས། ད་ནས་མི་ལོ་ཉི་ཤུ་ན་ཁྱོད་ཀྱི་ཡུལ་དུ་ཆོས་འདི་དར་བར་འགྱུར་རོ་ཞེས་ལུང་བསྟན་པ་ལྟར། གསེར་འོད་དམ་པ་སོགས་ཆོས་མང་དུ་སྒྱུར་བའི་སྦྱིན་བདག་མཛད་པ་སོགས་བསྟན་པའི་སྲོལ་བཏོད་པ་ནི། ཆོས་སྐྱོང་བའི་རྒྱལ་པོ་སྲོང་བཙན་སྒམ་པོ་གཉིས་པ་ས་འདིར་འོངས་སོ་ཞེས་ལྷ་རྣམས་གླེང་ངོ་༎
སྔར་སོག་པོ་ཚོ་ཆེན་དྲུག་ལ་གཞུང་དང་ཆིངས་ཡོད་པ་རྣམས་ཆ་དཀར་རྒྱལ་པོས་བཤིག་པའི་དུས་འཁྲུག་ལ་བརྟེན། བྲོས་པོ་འགའ་ཞིག་ཁར་ཁའི་ཁྲོད་དུ་འོངས་པར། དཔོན་པོ་ནང་ཕན་ཚུན་རྩོད་པའི་རྐྱེན་གྱིས། ཁར་ཁ་ཆོག་ཐུ་རང་ཡུལ་ནས་སྤྱུགས་ཏེ་མཚོ་ཁར་འོངས་པ། སྡིག་ཅན་གྱི་ཡུལ་དུ་རིན་པོ་ཆེའི་ཆར་བབ་པའི་གཏམ་རྒྱུད་ལྟར། རེ་ཞིག་མངའ་ཐང་ཆེ་བར་བྱུང་བས། ནག་པོའི་གདོན་གྱིས་ཡིད་རྣམ་པར་བརླམས་པས། བསྟན་པ་སྤྱི་དང་ཁྱད་པར་རྒྱལ་བ་བཙོང་ཁ་པའི་བསྟན་པ་ལ་ལོག་པར་འཁུ་བའི་བསམ་སྦྱོར་ངན་པ་ཉམས་སུ་བསྟར་བ་ལ་བརྟེན། རྒྱལ་པོ་འདི་ཉིད་ཀྱིས་བསྟན་པ་འབའ་ཞིག་ཐུགས་སུ་བཅུག་པའི། རང་ཡུལ་ནས་དམག་གི་དཔུང་ཚོགས་དང་ཆབས་གཅིག་པར་བཏེག་པ། མེ་གླང་ཟླ་བ་དང་པོར་མཚོ་ཁར་འབྱོར་ཏེ། སྟོབས་ལྡན་གྱི་རྒྱལ་པོ་རཱ་མ་ཎས་ལང་ཀའི་བདག་པོ་ལྔ་པའི་ལམ་དུ་བཏང་བ་བཞིན་ཆོག་ཐུའི་དམག་