[A:༡༩༡]རྒྱལ་པོ་འདི་ཉིད་ཆུ་ཕོ་རྟའི་ལོ་ལ་འཁྲུངས། མཚན་ཐོ་རོལ་པའི་ཧུར་བཏགས་སོ། ། དགུང་ལོ་བཅུ་གསུམ་ལོན་པའི་ཚེ། མགོ་དཀར་གྱི་དམག་ཁྲི་ཕྲག་ཙམ་གྱི་སྟེང་དུ། དམག་རྣམས་ཀྱི་སྣ་དྲངས་ཏེ་མཆོངས་པས་ཕ་རོལ་གྱི་དཔུང་ཚོགས་མཐའ་དག་འཇིག་བརྟེན་ཕྱི་མའི་ལྟད་མོ་དུས་གཅིག་ཏུ་མྱོང་བར་བྱས་པའི་གྲགས་པས། སྲིན་པོའི་རྒྱལ་པོ་ལང་ཀ་མགྲིན་བཅུ་མིའི་ཡུལ་དུ་རྒྱུ་བའི་འགྲན་ཟླ་གཉིས་པ་བྱས་སོ། ། དེ་སྐབས་ཡུལ་ཕྱོགས་དེ་དག་མཐའ་འཁོབ་ལས་ཀྱང་ཆེས་མཐའ་འཁོབ་ཏུ་གྱུར་པ་ཀླ་ཀློའི་རྒྱལ་ཁམས་ལྟ་བུར་གནས་པ་ལས། སོག་པོའི་ཡུལ་གྲུ་གཞན་དག་ཏུ། ཐམས་ཅད་མཁྱེན་པ་བསོད་ནམས་རྒྱ་མཚོ་དང་། གསེར་གྱི་རྒྱལ་པོ་མཆོད་ཡོན་ཟུང་གཅིག་ལ་བརྟེན་ནས་དམ་པའི་ཆོས་དར་ཞེས་པའི་ཆོས་ཀྱི་མིང་ཙམ་ཐོས་འཛིན་གྱི་རྒྱན་དུ་གྱུར་པས་ཡིད་དགའ་སྤྲོ་དང་བཅས་ཏེ་ཕྱོགས་དེར་ཕྱག་བཙལ་བས་དཔྲལ་བ་སྐྲངས་པ་ཙམ་དུ་གྱུར་ཅིང་། བསྟན་པའི་དབུ་བརྙེས་པ་ནི། ལྷ་ཐོ་རི་གཉན་ཤལ་ལ་གཉན་པོ་གསང་བ་བྱུང་བ་བཞིན་ནོ། ། མེ་རྟ་དགུང་ལོ་ཉེར་ལྔར་སླེབས་པའི་ཚེ། ཡུམ་གྲོངས་པའི་རྐྱེན་གྱིས་མཁོ་དགུའི་འབྱོར་པ་མཐའ་དག་མཆོག་དམན་གྱིས་སྐྱེ་བོ་རྣམས་ལ་སྦྱིན་པར་བཏང་ཞིང་། དེ་ཡང་ཚེ་འདིའི་སྙན་གྲགས་དང་། རྣམ་སྨིན་ལན་ལ་རེ་བ་ཙམ་མ་ཡིན་པར། སློབ་དཔོན་ཟླ་གྲགས་ཀྱིས། སྦྱིན་པ་སྦྱིན་བྱ་ལེན་པོ་གཏོང་པོས་གཏོང་ཞེས་གསུངས་པ་ལྟར། འཁོར་གསུམ་བདེན་སྟོང་གི་རྩིས་ཟིན་པའི་འཕགས་ཆེན་དམ་པའི་རྣམ་ཐར་རོ། ། བྱང་འཕགས་རྣམས་ནི་གཞན་དོན་དུ་འགྱུར་ཚེ་དམྱལ་བའི་མེ་འོབས་ཀྱང་མཐོ་རིས་ཀྱི་དགའ་བའི་ཚལ་བཞིན་དུ་འཇུག་པར་མཛད་པ་ནི་ཆོས་ཉིད་དེ། དེ་སྐབས་ཁར་ཁ་དང་ཨོ་རོད་ཕན་ཚུན་དུ་གཡུལ་རླབས་པོ་ཆེ་བཤམས་པའི་འཁྲུག་ལོང་གིས། སྲོག་གཅོད་པའི་སྡིག་པའི་ལས་རྔམ་པོ་ཆེས། ངན་སོང་མུ་མཐའ་མེད་པའི་ནགས་ཀླུང་སྟུག་པོར་བསྐྱུར་བའི་སྦྱོར་བ་ལ་བརྩོན་པ་དག་ལ་དམིགས་པ་མེད་པའི་སྙིང་རྗེ་ཆེན་པོའི་གཞན་དབང་