[A:192]du gyur te/ khar kha o rod phan tshun du 'grul tsam yang byed mi nus pa'i skabs/ bdag gzhan brje ba'i snying stobs kyi go cha btsan po gyon te/ khar kha'i khrod du tsham tshom med par byon nas/ gzhung dka' tshegs chung ngus bzlums par mdzad pa dge legs pa'i pha rol tu phyin pa lta bu'i rnam thar ro/ / stong 'khor chos rje dang khar kha'i rgyal blon rnams yi rangs te/ da'i gu shri zhes cho lo byin/ slar rang yul du byon/ rje bsod nams rgya mtsho la o rod cig gis mdo sde gser 'od dam pa la phyag nas zhus pa'i tshe/ gsung rab kyi ming dri ba gnang bar/ al tan ge ril zer zhus pas/ da nas mi lo nyi shu na khyod kyi yul du chos 'di dar bar 'gyur ro zhes lung bstan pa ltar/ gser 'od dam pa sogs chos mang du sgyur ba'i sbyin bdag mdzad pa sogs bstan pa'i srol btod pa ni/ chos skyong ba'i rgyal po srong btsan sgam po gnyis pa sa 'dir 'ongs so zhes lha rnams gleng ngo //
sngar sog po tsho chen drug la gzhung dang chings yod pa rnams cha dkar rgyal pos bshig pa'i dus 'khrug la brten/ bros po 'ga' zhig khar kha'i khrod du 'ongs par/ dpon po nang phan tshun rtsod pa'i rkyen gyis/ khar kha chog thu rang yul nas spyugs te mtsho khar 'ongs pa/ sdig can gyi yul du rin po che'i char bab pa'i gtam rgyud ltar/ re zhig mnga' thang che bar byung bas/ nag po'i gdon gyis yid rnam par brlams pas/ bstan pa spyi dang khyad par rgyal ba btsong kha pa'i bstan pa la log par 'khu ba'i bsam sbyor ngan pa nyams su bstar ba la brten/ rgyal po 'di nyid kyis bstan pa 'ba' zhig thugs su bcug pa'i/ rang yul nas dmag gi dpung tshogs dang chabs gcig par bteg pa/ me glang zla ba dang por mtsho khar 'byor te/ stobs ldan gyi rgyal po rA ma Nas lang ka'i bdag po lnga pa'i lam du btang ba bzhin chog thu'i dmag