[A:༢༠]ཚ་གདུང་ལྷག་མེད་དུ་བཅིལ་བའི་མདུན་ན་འདོན་གཉལ་ནས། ཐོན་མི་ཨ་ནུའི་བུ་སམྦྷོ་ཊ་བྲན་དང་བཅས་པར་གསེར་ཕྱེ་བྲེ་གང་དང་གསེར་གྱི་པ་ཊ་སོགས་རིག་བྱེད་སྨྲ་བའི་སྟོན་པ་ཡིད་རང་དབང་དུ་བྱེད་པའི་དངོས་པོ་དང་བཅས་ནས་འཕགས་ཡུལ་དུ་ཡི་གེ་སློབ་པར་བཀས་གནང་སྟེ། བཤུལ་དུ་འཚེ་བ་དང་བྲལ་ནས་བགྲོད་དེ་བྲམ་ཟེ་ལེ་བྱིན་ལ་ཡིག་རིགས་སུམ་བརྒྱ་དྲུག་ཅུ་རྩ་བཞི་དང་། པཎྜི་ཏ་ལྷ་རིག་པའི་སེང་གེ་ལ་སྒྲ་པཱཎི་བྱཱ་ཀ་ར་ཎ། རྟོགས་སླ་བ་རྒྱལ་པོ་ལུགས་ཀྱི་བསྟན་བཅོས། ཀལཱ་པ། རྟོགས་དཀའ་བ་པཎྜི་ཏ་ལུགས་ཀྱི་བསྟན་བཅོས། ཙནྡྲཔ་རྣམས་ཀྱི་ས་རིས། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་དང་བཅས་པ་བསླབས་ནས།
བདག་ཅག་བློན་པོ་ཐོན་མི་ལ༎
མ་ལུས་གནང་བ་ཐུགས་ལ་བཏགས༎
རྒྱ་གར་ཡུལ་དུ་ཕྱིན་པ་ཡིན༎
མཁས་གྲུབ་ཁྱེད་དང་མཇལ་བ་ཡིན༎
ཞེས་དྲིན་དུ་གཟོ་བའི་གསུང་བྲམ་ཟེ་ལ་བྱོན་ཏེ་བོད་དུ་ཕེབས་ནས། རྒྱལ་བློན་གཉིས་ཕོ་བྲང་མ་རུར་ལོ་གསུམ་མཚམས་བཅད་དེ་ཡི་གེ་དང་སྒྲ་རྣམས་སློབ་པའི་ཚུལ་མཛད་པས་མཁས་པའི་དཔྱིད་དུ་གྱུར་ཀྱང་དེའི་ནང་དུ་བོད་སྐད་ལ་ཉེ་བར་མཁོ་བའི་སྒྲ་དང་ཡིག་རིགས་མི་འདུག་པར་དགོངས་ནས་བློན་པོར་གསུངས་པས། ཐོན་མིས་འཇམ་དཔལ་དབྱངས་ལ་གསོལ་བ་བཏབ་པའི་ཐུགས་རྗེའི་ཆར་གྱིས་ཡིད་ཀྱི་ཞིང་ས་བརླན་པ་ལས། བོད་ཀྱི་ཡི་གེའི་གཟུགས་སྡེབ་ཀྱི་རྣམ་འགྱུར་གྱི་མྱུ་གུ་ཤར་བའི་འབྲས་བུ་མངོན་དུ་གྱུར་ཚུལ་ནི། དབྱངས་བཅུ་དྲུག་ལས་ཨི་ཨུ་ཨེ་ཨོ་བཞི་དང་གསལ་བྱེད་སུམ་ཅུ་རྩ་བཞི་ལ་ལོག་པ་ལྔ་འཐུག་པ་ལྔ་ཥ་ཀྵ་རྣམས་དོར་བའི་སྟེང་དུ་ཨ་དྲངས་པའི་རྩ་བཞིར། གཅིག་