[A:༣༡]ཆོས་ཀྱི་རྒྱལ་པོ་སྲོང་བཙན་སྒམ་པོ་ནི༎
བྱང་ཆུབ་སེམས་དཔའི་སྤྲུལ་པ་མི་དྲུག་ལྡན༎
ཡོད་ཏན་དཔག་ཏུ་མེད་པའི་རྒྱལ་པོ་ཡིན༎
ཞེས་སྤྲོ་བ་བསྲིངས་ནས།
བུ་ཚ་ཡིག་ཚང་སློབ་ཅིང་དགེ་བ་དག་ལ་སྦྱར༎
དཀོན་ཅོག་དབུ་འཕངས་བསྟོད་ཅིང་དད་དང་གུས་པ་སྐྱེད༎
ཆོས་འཁོར་གཙུག་ལག་བཞེངས་ཤིང་གནས་གྲར་དགེ་གནས་ཚུགས༎
སངས་རྒྱས་སྐུ་གཟུགས་བཞེང་ཞིང་དམ་ཆོས་གཞུང་ཡང་བྲིས༎
ཐོས་བསམ་སྒོམ་པ་བྱ་ཞིང་དམ་ཆོས་ནང་དུ་སྤྱད༎
དགེ་འདུན་རྙེད་བཀུར་བྱ་ཞིང་དམ་ཚིག་སྡོམ་པ་སྲུངས༎
དམ་ཆོས་དུས་དྲན་བྱས་ལ་དེ་རིང་ཉིད་ནས་འབད༎
ཆོས་ལ་ལོང་ཡོད་མི་སེམས་ཚེ་འདིར་ཆགས་མི་བྱ༎
སྐྱབས་ཆེན་ལྷ་རུ་གཟུང་ལ་དཀོན་ཅོག་སྐྱབས་འགྲོ་བྱ༎
ལས་དང་འབྲས་བུ་སེམས་ལ་སྡིག་སྤོང་དགེ་ལ་འབད༎
འཁོར་བའི་ཉེས་དམིགས་བསམ་ལ་ངེས་འབྱུང་བློ་གཏད་བྱ༎
འཁོར་བའི་ཉོན་མོངས་སྤངས་ཤིང་དེ་ཡི་གཉེན་པོ་སྟེན༎
བྱམས་དང་སྙིང་རྗེ་བསམ་ལ་བྱང་ཆུབ་སེམས་ཀྱང་སྐྱེད༎
བྱང་ཆུབ་སྤྱོད་པ་སྤྱད་ཅིང་ཐེག་ཆེན་ལམ་བགྲོད་བྱ༎
དེ་ལྟར་བྱས་ན་བཀྲ་ཤིས་དགེ་བར་འགྱུར༎
གཏམ་གྱི་མཐའ་མ་ཡིན་ནོ་བུ་མོ་དེ་ལྟར་མཛོད།
ཅེས་སོགས་ཆོས་དང་སྲིད་ལ་མཁོ་བའི་ཞལ་གདམས་མང་དུ་གསུངས་ནས་བོད་ཀྱི་རྒྱལ་པོའི་བཙུན་མོ་རིན་པོ་ཆེར་བརྫངས་སོ། ། དུས་དེར་མཐོང་སྣང་གསུམ་བྱུང་བ་ནི། ཕྱོགས་བཅུའི་བདེ་གཤེགས་བྱང་སེམས་རྣམས་ཀྱི་གཟིགས་ངོར།