[A:༣༢]རྗེ་བཙུན་ཕྱག་ན་པདྨོ་དང་ཇོ་མོ་སྒྲོལ་མ་གཉིས་ཕན་ཚུན་དུ་ཐུགས་རྗེའི་འོད་ཟེར་གྱིས་བསྐུལ་བའི་མཐུས། བོད་ཁམས་ཀྱི་དོན་དུ་གཤེགས་པར་གཟིགས། རྒྱ་ནག་པ་རྣམས་ཀོང་ཇོ་བོད་ཀྱི་སྤྲུལ་པའི་རྒྱལ་པོའི་བཙུན་མོར་འཁྱེར་བར་མངོན། བོད་འབངས་རྣམས་ཀྱིས་ནི། དཔའ་མཛངས་འཕྲུལ་ལྡན་གྱི་བློན་པོ་མགར་སོགས་རྒྱུ་རྗེའི་ཕོ་བྲང་དུ་ལྷ་གཅིག་སྤྱན་འདྲེན་པའི་རྟེན་ཏུ་བཻ་ཌཱུརཡའི་རྨོག་དང་བཅས་ཏེ་མངགས་པ་རྒྱལ་ཁབ་ཏུ་སླེབ་པ་དང་། རྒྱ་རྗེ་ཡབ་ཡུམ་སྲས་ལྷ་གཅིག་དང་བཅས་པ་མཐའ་དག་བོད་ལ་སྟེར་མ་འདོད་པའི་བསྙད་དུ། རྒྱལ་པོ་ཆེན་པོ་གཞན་ཞིག་ལ་སྟེར་བར་གྲོས་མཐུན་ཀྱང་། ནང་གསེས་ཀྱི་ཡབ་ཆོས་ལ་དགྱེས། ཡུམ་ལོངས་སྤྱོད་འདོད། སྲས་དམག་ལ་དགའ། ལྷ་གཅིག་གཟུགས་ཡིད་དུ་འོང་བ་ལ་འདོད་པའི་དབང་གིས་ཕོ་ཉ་སོ་སོར་མངགས་པས། རྒྱ་གར་ཆོས་ཀྱི་རྒྱལ་པོ། སྟག་གཟིག་ནོར་གྱི་རྒྱལ་པོ། གེ་གསར་དམག་གི་རྒྱལ་པོ། གཟུགས་མཛེས་ཁྲོམ་གྱི་རྒྱལ་པོ་བཞིའི་བློན་པོ་ལྔ་བརྒྱ་ཡང་ལྷ་གཅིག་སྤྱན་འདྲེན་པའི་ཆེད་དུ། རྒྱ་རྗེའི་ཕོ་བྲང་དུ་སླེབ་པ་ལས། རྒྱ་ཐམས་ཅད་བོད་ལ་མི་དགའ་ཡང་། ཁྲིམས་ལ་ཉེ་རིང་མི་བཏུབ་པའི་དབང་གིས་བློན་པོ་རིག་པ་སུ་རྣོ་བ་ཞིག་ལ་སྟེར་བར་བྱས་ཏེ། བཙན་པོའི་བླ་གཡུ་ཕུབ་ཙམ་ལ་མིག་གཅིག་མཐའ་ན་ཡོད་ཅིང་མིག་གཅིག་དཀྱིལ་ན་ཡོད་པ་ནང་གི་མིག་ཀྱང་ཕུབ་ཀྱི་སྤ་རིམ་ལྟར་ཡོད་པའི་ཁྱད་འཕགས་ཤིག་ཡོད་པ་དེ་གཏད་ནས་མིག་ཏུ་དར་ཡུག་སུས་ཚུད་ལ་སྦྱིན་ནོ་ཟེར་བས། བློན་པོ་གཞན་རྣམས་ཀྱིས་ཉི་མ་མང་པོའི་བར་དུ་ཐབས་སྣ་ཚོགས་བྱས་ཀྱང་མ་ཚུད་པར། མགར་གྱིས་རྒྱའི་གྲོག་མ་གཟན་གྱིས་གསོས་པའི་མཐེ་བོང་ཙམ་ཞིག་གི་སྐེད་པ་ལ་དར་སྐུད་དང་། དེའི་སྣེ་ལ་དར་ཡུག་བཏགས་ཏེ་དབུས་ཀྱི་མིག་ཏུ་བཅུག་ནས་ཕུས་བཏབ་པ་མཐར་འཐོན་ཏེ་ལྷ་གཅིག་གནང་བར་ཞུས་ཀྱང་། བོད་ལ་སྟེར་མ་འདོད་པའི་བསྙད་ཀྱིས། དེ་ཙམ་གྱིས་བྱ་བ་མ་རྫོགས་པ་སྐད་དུ། བྱ་མ་བརྒྱ་བུ་བརྒྱ། ཤིང་ཟླུམ་པོ་རྩ་རྩེ། ཉིན་གཅིག་མི་རེས་ལུག་