[A:༣༨]མགར་གྱིས་ཁྲི་བཙུན་ལ། ཀོང་ཇོ་སྤོར་ཐང་གི་རྩིས་ལ་མཁས་པའི་དབང་གིས་གཙུག་ལག་ཁང་གི་ས་དཔྱད་སོགས་འདྲི་དགོས་པས། རྒྱལ་པོ་དང་མཇལ་དུ་བཅུག་པ་འཐད་ཅེས་གྲོས་བཏབ་ནས། མཇལ་འཕྲད་ཀྱི་དགའ་སྟོན་འཆི་བ་མེད་པའི་དཔལ་ལ་འགྲན་པ་བྱས་པའི་དུས་སུ། བལ་བཟས།
རྒྱ་མོ་འུན་ཤིང་ཀོང་ཇོ་ཁྱོད༎
དཀའ་ལས་བྱས་ནས་སྙེ་བོས་བཀུག།
བོད་ཀྱི་ཡུལ་དུ་བྱོན་ན་ཡང་༎
ང་ནི་སྔ་བས་ཆེན་མ་ཡིན༎
ཞེས་སོགས་སྨྲས་པར། ཀོང་ཇོས།
འགྲན་པའི་འགྲན་སེམས་མེད་མོད་ཀྱང་༎
ཁྱོད་ཀྱིས་འགྲན་ནོ་ཞེས་སྨྲས་པས༎
ཐེམ་པ་སྔ་བརྒལ་ཆེན་མ་ཁྱོད༎
ལྷ་ཁང་རྒྱ་མཚོའི་སྟེངས་སུ་བཞེངས༎
ཞེས་སོགས་ཀྱི་ལན་བརྗོད་པའི་ཆེན་ཆུན་གྱི་གཏམ་བྱུང་སྐད། དེ་ནས་ལྷ་གཅིག་ཁྲི་བཙུན་གྱིས་བཙན་པོ་ལ་ལྷ་ཁང་རྩིག་པའི་གྲོས་ཞུས་པས། ཁྱོད་རང་གང་ལེགས་སུ་བརྩིགས་ཤིག་གསུངས་པ་ལྟར། ལ་གདོང་གི་ནེའུའི་ཁར་བརྩིགས་པར་མཚན་མོ་ལྷ་འདྲེས་བཤིགས་པས། གཡོག་མོ་ཞིག་ལ་གསེར་ཕྱེ་བྲེ་གང་བསྐུར་ནས། ཀོང་ཇོ་ལ་རྩིས་བྱེད་པར་ཞུས་པས། སྤོར་ཐང་བརྒྱད་ཅུ་སྐོར་གྱིས་སྟེང་ནས་བརྩིས་པས། ཁ་བ་ཅན་གྱི་ཡུལ་འདི་སྲིན་མོ་གན་རྐྱལ་དུ་འགྱེལ་བ་ལྟ་བུར་