[A:༣༧]ལེགས་ལམ་མཆོག་གི་མན་ཤེལ་གསར་པའི་གོས༎
ཀླུབས་པའི་མི་བདག་ཐུགས་རྗེའི་ལྕགས་ཀྱུ་ཡིས༎
རྒྱ་བལ་ཕུན་ཚོགས་དངོས་ཀུན་བསྡུས་པ་ན༎
གསེར་མངལ་ཅན་ཡང་འདུད་སྙམ་འཕྱང་མོ་ཉུག།
ངལ་བ་མེད་པར་མཁའ་དབྱིངས་ལུས་ཕྲ་མས༎
བཞིན་ངོས་འཁོར་ལོས་སྒྱུར་ཐབས་སྨིན་མའི་གློག།
ཀུན་གྱི་གཟིགས་མོར་མཚར་བའི་འཕྲེང་བ་འདིས༎
རྒྱལ་ཐབས་རྡོ་རྗེའི་གཟེགས་མ་འཕྲོས་སྙམ་བྱེད༎
ཨེ་མ་རི་དྭགས་མིག་ཅན་འབུམ་ཕྲག་གི།
བྱེད་པོས་ལང་ཚོའི་ཚོགས་ཀུན་བསྡུས་པའི་དཔྱིད༎
རིན་ཅེན་བཙུན་མོར་གྲུབ་པའི་ཕན་བདེའི་ནོར༎
བོད་འབངས་ཡོལ་གོའི་ནང་དུ་འཕྱུར་བུར་གཏམས༎
དེ་ནས་ཀོང་ཇོ་འཁོར་བཅས་རྣམས་ལྷ་སའི་ཕྱོགས་སོ་སོར་འཁོད་པའི་སྐྱེ་བོ་རྣམས་ལ་སྤྲུལ་པའི་དབང་གིས་མཐོང་སྣང་མི་འདྲ་བ་དུ་མ་བྱུང་ཡང་། དོན་དུ་བྱང་ཕྱོགས་ནས་བྱོན་ཏེ་ལྷ་གཅིག་རྩིས་ཀྱི་གཙུག་ལག་ལ་མཁས་པས། བོད་སྲིན་མོ་གན་རྐྱལ་དུ་འགྱེལ་བའི་དབྱིབས་སུ་གཟིགས། ཀླུའི་ཕོ་བྲང་གི་སྟེང་དུ་ཇོ་བོ་བཞུགས་ན་ནོན་པར་མཁྱེན་ནས། དེ་ཉིད་དུ་སྐུའི་ཕྱོགས་བཞིར་ཀ་བ་བཙུགས་ནས། དར་གྱི་ཡོལ་བས་མཐའ་བསྐོར་ཏེ། ཇོ་བོ་ཤཱཀྱ་མུ་ནི་ལ་མཆོད་པའི་རོལ་མོ་དྲི་ཟའི་རྒྱུད་མང་ལྟ་བུར་དཀྲོལ་བས། བལ་མོ་བཟས་ཅི་ཡིན་སྙམ་ནས་ཕོ་བྲང་གི་རྩེ་ནས་བལྟས་པས། ཀོང་ཇོ་དཔོན་གཡོག་བྱོན་པ་མཐོང་ནས། ཕྲག་དོག་སྟེ། རྒྱལ་པོ་དང་ཀོང་ཇོ་མཇལ་བའི་གེགས་བྱས་པར། བློན་པོ་