[A:༤༢]
དེ་ནས་ལྷ་ཁང་རྩིག་པར་མངོན་དུ་ཕྱོགས་པ་ན་ལྷོ་ནུབ་གླ་བའི་ཚལ་ན་ལྷ་མ་སྲིན་རྣམས་འཚོགས་ཏེ། འདྲེ་སྒང་པོ་བདུད་མི་ཟན་བྱ་བ་གཅིག་ན་རེ། བུདྡྷ་དྷརྨ་སཾ་གྷ་ཟེར་བ་རྣམས་ལ་སྐྱབས་སུ་འགྲོ་བའི་སྲོག་གཅོད། སྔར་བརྩིགས་པའི་ལྷ་ཁང་བཤིག་ཆོས་བྱེད་ཟེར་བ་ལ་རིམས་ནད་དང་། བོད་ཁམས་སུ་ལོ་ཉེས་གཏོང་བའི་མདུན་མ་བྱེད་པ་རྒྱལ་པོས་གཟིགས་ནས། རང་བྱོན་ཐུགས་རྗེ་ཆེན་པོ་ལ་གསོལ་བ་བཏབ་པས། ཇོ་བོ་བཞད་པའི་ཞལ་ནས་འོད་ཟེར་བྱུང་བ་མེར་གྱུར། ཁྲོས་པའི་ཞལ་ནས་འོད་ཟེར་བྱུང་བ་རྟ་མགྲིན་དང་བདུད་རྩི་འཁྱིལ་པར་གྱུར། ཁྲོ་བོ་མེ་དང་བཅས་པ་སྐར་མདའ་འཕངས་པ་ལྟར་སོང་འདྲེའི་འདུ་ཕུང་བཤིག་ནས། དུས་མཐའི་རླུང་དང་མེའི་ཤུགས་ལ་འགོད་པར་ནུས་པའི་རྫུ་འཕྲུལ་གྱིས་གདུག་པ་ཅན་མཐའ་དག་ཕྱིའི་རྒྱ་མཚོའི་ཕ་རོལ་ཏུ་བསྐྲད། ཟླ་བ་ཚལ་གྱི་བྲག་ལ་སྣང་བ་མཐའ་ཡས། ཁ་སརྤ་ཎི། རྟ་མགྲིན་གསུམ་རང་བྱོན་དུ་བྱོན་པ་ཇི་ལྟ་བ་བཞིན་བལ་པོའི་ལྷ་བཟོས་གསལ་བར་བརྐོས་སོ། ། དེ་ནས་རྒྱལ་པོས་སྤྲུལ་པ་མཐའ་ཡས་པ་བསྟན་ཏེ་ཆར་ཟིམ་བུ་འབབ་པའི་ན་བུན་གྱི་འཕྲེང་བ་འཁྲིགས་པའི་ངང་དུ་གཙུག་ལག་ཁང་རྣམས་བརྩིགས་ནས། ནང་པར་སྤྲུལ་པ་རྣམས་ཀྱིས་ཤིང་བཟོ་བྱེད་པའི་སྐབས། ཁྲི་བཙུན་རང་གིས་ཞལ་སྐྱེམ་འདྲེན་དུ་བྱོན་པ་ལ། གཡོག་མོས་སྒོ་སྲུབས་ནས་བལྟས་པས། དར་ཐོད་ཅན་གཞན་ལས་ཆེ་བ་ཞིག་ལ་འདྲེན་གྱི་འདུག་པ་མཐོང་བས། སྤྲུལ་པ་ཁོ་ནར་འདུག་ཅེས་བགད་པས། རྒྱལ་པོ་སྤྱན་ཡེངས་ནས་སྟེའུ་ཁ་ཐལ་བས་སེང་གེ་བརྒྱའི་སྣ་བཅད། གཟོང་ཁ་ཐལ་བས་བུག་པ་བརྒྱ་ཕུབ། སོག་ལེ་ཁ་ཐལ་བས་ཀ་བ་བརྒྱའི་ཟུར་ཉམས་སྐད། དེའི་མཚན་འོག་ཁང་གི་ཐོག་ཕུབ། དེ་ནས་ཁྲི་བཙུན་གྱིས་བལ་ཡུལ་ནས་བཟོ་བོ་མཁས་པ་དུ་མ་བོས་ནས། སྟེང་ཁང་རྣམས་བཞེངས་པ་དང་དུས་མཚུངས་པར་ཀོང་ཇོས་རྒྱའི་བཟོ་བོ་མཁས་པ་རྣམས་བཀུག་ནས་ར་མོ་ཆེའི་གཙུག་ལག་ཁང་བཞེངས་ཏེ། ཐུགས་རྗེ་ཆེན་པོ་འཇིག་རྟེན་