[A:༥༠]རྗེ་དེ་དང་མཆིམས་བཟའ་བཙན་མོ་རྟོག་གེའི་སྲས་ཁྲི་ལྡེ་གཙུག་བརྟན་མེས་ཨག་ཚོམས་ཕོ་བྲང་ལྡན་མཁར་དུ་འཁྲུངས། ཆོས་རྒྱལ་སྲོང་བཙན་སྒམ་པོས། ད་སྟེ་གདུང་རབས་ལྔ་ན་ངའི་དབོན་སྲས་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ཆོས་འབྱུང་བའི་ལུང་བསྟན་ཟངས་ཀྱི་བྱང་བུ་ལ་བྲིས་པ་བརྙེད་པས། རང་ཉིད་དུ་གོ་སྟེ། གངས་ཏི་སེ་ནས་པཎྜི་ཏ་སངས་རྒྱས་གསང་བ་དང་སངས་རྒྱས་ཞི་བ་གཉིས་གདན་དྲངས་ཀྱང་མ་འདྲོངས། འོན་ཀྱང་ཕོ་ཉ་བས་ཐེག་པ་ཆེན་པོའི་མདོ་སྡེ་ལྔ་བློ་ལ་བཟུང་ནས་འོངས་པས། གླེགས་བམ་ལྔ་པོ་བཞེངས་ཏེ། བཞུགས་ཁང་དུ་བྲག་དམར་མགྲིན་བཟང་། བྲག་དམར་ཀེ་རུ། གསང་མཁར་བྲག་མཆིམ་པོ་སྣ་རལ། མ་ས་གོང་གི་ལྷ་ཁང་དང་ལྔ་བཞེངས། རྒྱ་ཡུལ་ཀིང་ཤི་ནས་གསེར་འོད་དམ་པ་དང་འདུལ་བ་ལས་རྣམ་པར་འབྱེད་པ་དང་། སྨན་དཔྱད་ཀྱི་རིགས་འགའ་ཞིག་བསྒྱུར། ལི་ཡུལ་ནས་རབ་ཏུ་བྱུང་བ་སྤྱན་དྲངས་ནས་གུས་པར་མཛད་ཀྱང་བོད་ཀྱི་མིས་རབ་ཏུ་བྱུང་བ་ནི་མ་བྱུང་། ཕྱིང་བ་སྟག་རྩེ་ནས་ནོར་ཁྱད་དུ་འཕགས་པ་གཡུ་ཞིག་རྙེད། འཇང་མོ་ཁྲི་བཙུན་ཁབ་ཏུ་བཞེས་པར་སྲས་འཇང་ཚ་ལྷ་དབོན་ཞེས་པ་ལྟ་བས་ཆོག་མི་ཤེས་པའི་མཛེས་སྡུག་ཅན་ཞིག་འཁྲུངས་པར་བོད་ན་དེའི་གཙུན་མོར་འོས་པའི་ན་ཆུང་མ་རྙེད་པས། རྒྱ་རྗེ་ཡག་འཇམ་ལི་ཁྲི་བཞེར་ལང་མའི་སྲས་མོ་ཀོང་ཇོ་བསུ་བའི་སྐྱེས་ཀྱི་དངོས་པོ་དང་ཕོ་ཉ་མངགས་པར་ལེགས་ཉེས་སྟོན་པའི་མེ་ལོང་ཞིག་ཡོད་པར་བལྟས་པས་ཡར་ཀླུངས་ཀྱི་ཡུལ་དགེ་བཅུའི་ཡོན་ཏན་ཡོངས་སུ་ཚང་ཞིང་། རྒྱལ་བུ་དེ་ལྷའི་ཁྱེའུ་ལྟར་མཛེས་པ་ཞིག་ཏུ་མཐོང་ནས་བྱོན་ནའང་། གཉགས་ཀྱི་བུ་མོ་མ་བླངས་པའི་འཁོན་གྱིས་གཉགས་ཁྲི་བཟང་ཡང་འདོན་གྱི་རྒྱལ་བུ་བཀྲོངས། བང་སོ་མུ་ར་རི་ལ་བརྩིགས། དུས་དེར་ཀོང་ཇོས་མེ་ལོང་ལ་བལྟས་པས། རྒྱལ་བུ་བཞིན་མི་སྡུག་པ་ཞིག་ཏུ་མཐོང་བ་བཞིན་བོད་ནས་གཏམ་ངན་པ་སྐྱེལ་མི་བྱུང་ནའང་བྱོན། ཇོ་བོ་རྒྱལ་རབས་གསུམ་དུ་མུན་པར་བཞུགས་པ་ལྷོ་སྒོ་མེ་ལོང་