[A:༥༡]ཅན་ནས་བཏོན་ཏེ་གཙང་ཁང་དབུས་མར་བཞུགས་སུ་གསོལ་ནས་མཆོད་པ་བཙུགས། མཆིམས་ཕུར་མེས་ཨག་ཚོམས་ཀྱི་བཙུན་མོར་མངའ་གསོལ་ལོ༎ སྨྲས་པ།
ལེགས་བྱས་ས་འཛིན་དབང་པོས་བསྲུབས་པའི་འཕགས་མཆོག་ཐུགས་རྗེའི་ཆུ་གཏེར་ལས༎
མངོན་པར་ཐོན་པའི་སྲོང་བཙན་ཉིན་བྱེད་ནུབ་ཕྱོགས་ཆུ་ལྷའི་ལྟོར་གཟིམས་ཀྱང་༎
སླར་ཡང་ཁྲི་སྲོང་བསིལ་སྦྱིན་མཁན་པོ་དབང་ཕྱོགས་རི་བོའི་སྤོར་སོན་པས༎
ཕན་དང་བདེ་བའི་ཀུན་ད་བཞད་དོ་ལུས་ཅན་གཉིས་སྐྱེས་གར་བྱོས་ཀྱེ༎
བགྲོད་དཀའི་ཡུལ་ཀུན་ངལ་བ་བརྒྱ་ཕྲག་གིས༎
དཱ་རི་དྲ་བཞིན་མྱུལ་བར་མ་ཕྱིན་ཀྱང་༎
བརྟན་གཡོའི་ཆོས་ཀྱི་གནས་ཚུལ་ཀུན་འཆར་བ༎
སྐྱེས་ཐོབ་ཤེས་རབ་མེ་ལོང་གསར་པའི་དྲིན༎
༈ དེ་ཡང་མགོན་པོ་ཟུར་ཕུད་ལྔ་པའི་འཕྲིན་ལས་སུ་ཝ་རྞའི་འཁོར་ལོའི་ལྟ་བ་ལྷུན་གྱིས་གྲུབ་པའི་མཆོད་སྡོང་ཆེན་པོ་བོད་ཀྱི་རྒྱལ་པོའི་རིགས་ཀྱི་སྐྱེས་བུ་མིའི་ཁྱུ་མཆོག་ཏུ་འཕགས་པར་སྤྲུལ་ནས་ལུགས་ཟུང་གི་རྩིབས་སྟོང་ཐོགས་པ་མེད་པར་འཁོར་བའི་ཆེད་དུ་ཡབ་ཁྲི་ལྡེ་གཙུག་བརྟན་དང་། ཡུམ་ཀོང་ཇོ་གཉིས་ཀྱི་སྲས་སུ་སྣ་ཚོགས་ཞེས་པ་ཆུ་རྟའི་ལོ་ཕོ་བྲང་བྲག་དམར་དུ་རྒྱལ་པོ་ཁྲི་སྲོང་ལྡེའུ་བཙན་སྐུ་བལྟམས། དུས་དེར་རྒྱལ་པོའི་བཙུན་མོ་རྣམ་སྣང་བཟས་ཀྱང་