[A:༥༣]སྟོན་གྱི་ལུགས་སོགས་ཡིག་ཚང་མང་པོ་ཞིག་གི་འདོད་པ་བསྐྱར་ཞིང་། སྦ་བཞེད་ཀྱི་ལུགས་དེ་འཁྲུལ་པར་བཤད་མ་ཐག་ཏུ། སྦ་བཞེད་ཀྱི་གཏམ་རྒྱུས་ཚང་བར་བྲིས་པ་ལ། རང་ལུགས་འཐད་ལྡན་དུ་བཞག་པ་དང་། གཞན་ལུགས་མི་འཐད་པར་དགག་པའི་རྣམ་དབྱེ་མེད་པར་མིག་གིས་མཐོང་ཚད་དང་རྣ་བས་ཐོས་ཚད་ཡི་གེར་བྲི་བ་ནི་སོས་དུས་ཀྱི་ཉི་མ་འཕུལ་བྱེད་ཀྱི་ཐབས་ནི་ཡིན་མཆིས། མཁས་པ་ཆེན་པོ་བུ་སྟོན་ཞབས་ཀྱི་གསུང་ཕལ་ཆེར་ཚད་མར་གདའ་བས། རྒྱལ་པོ་ས་རྟ་ལ་འཁྲུངས་པར་གསུངས་པ་འདི་ཡིག་མཁན་གྱིས་ནོར་བའི་རྒྱུན་འབྱམས་པ་ཞིག་ཡིན་ནམ། གང་ལྟར་ཆོས་རྗེ་བསོད་ནམས་གྲགས་པ་སོགས་འགའ་ཞིག་གིས། རྒྱལ་པོ་ཁྲི་སྲོང་ལྡེ་བཙན་ས་རྟ་ལ་འཁྲུངས་པ་དང་། ཆོས་རྒྱལ་སྲོང་བཙན་སྒམ་པོ་མེ་གླང་ལ་འཁྲུངས་པར་བྱེད་པ་ནི། གཙུག་ལག་རྩིས་ཀྱི་གཞུང་ལུགས་ལ་བློ་གྲོས་ཀྱི་འཇུག་པ་ཤར་བ་ཞིག་གིས་བརྟགས་ཚེ་ལོ་གྲངས་བཅུ་གཉིས་ཙམ་མི་འགྲིག་པའི་མུ་ཅོར་གྱི་གཏམ་དུ་ཟད་དོ། ། སྲས་དགུང་ལོ་ཆུང་ངུའི་དུས། རྒྱ་ཡུལ་དུ་སང་ཤི་གཙུག་ལག་འགའ་ཞིག་ལེན་དུ་གཏང་བར་ལམ་དུ་ཞུགས་པ་དང་། རྒྱ་ཡུལ་གྱི་ཇུ་ཞག་མཁས་པ་ཞིག་གིས། དེ་སྟེ་ཟླ་བ་གསུམ་ན་ནུབ་ཕྱོགས་ནས་བོད་བཙད་པོའི་ཕོ་ཉ་རྟགས་དང་ཤ་ཚུགས་འདི་འདྲ་བ་འབྱུང་ཞེས་གཟུགས་བརྙན་བྲིས་ནས་རྒྱལ་པོར་གསོལ་བ་བཞིན་བྱུང་བས། རྒྱ་རྗེ་དགྱེས་པའི་དཀའ་སྩལ་ཞིང་། མཐིང་ཤོག་ལ་གསེར་གྱིས་བྲིས་པའི་གླེགས་བམ་སོགས་བྱ་དགའ་ཆེན་པོ་གནང་། དུས་སྐབས་དེ་དག་ན་བོད་དུ་ཡབ་རྒྱལ་པོ་དགུང་ལོ་དྲུག་ཅུ་རེ་གསུམ་ལ་གཤེགས། བང་སོ་མུ་ར་རི་ལ་བརྩིགས། སང་ཤི་སླར་བོད་དུ་ཡོང་བའི་ལམ་དུ་ཧྭ་ཤང་མངོན་ཤེས་ཅན་ཞིག་ལ་བོད་ཀྱི་བདེ་དོག་དྲིས་པས། བཙན་པོ་གཤེགས། རྒྱལ་བུ་ནར་མ་སོན། བདུད་བློན་རྣམས་ཀྱིས་ཁྲིམས་བུ་ཆུང་བཅས་ནས་ཆོས་བསྣུབ་པ་སོགས་ཀྱི་ལུང་བསྟན། འོན་ཀྱང་རྒྱལ་བུ་ནར་སོན་པ་ན་གླེགས་བམ་གསུམ་པོ་འདི་རྣམས་རིམ་གྱིས་སྙན་དུ་གསོལ། ཟ་